Deputeti i NISMA-s Milaim Zeka ka folur për herë të parë në Kuvend pas sherrit dhe dhunës së ushtruar nga deputeti i Vetëvendosjes, Frashër Krasniqi. Zeka ka thënë se Vetëvendosje është krijuar nga SHIK-ut, por që sipas tij, tashmë Kadri Veselit i kanë mbetur tepricë teknologjike. Deputeti i NISMA-s tha se urdhrin për dhunën ndaj tij e ka dhënë deputeti i VV Albin Kurti.
“Hera e parë që kam dëgjuar që një ministër punëson bujq, unë e di që ministrat krijojnë politika. Dëshiroj të them se ne si NISMA dhe ne si deputet, në momentin që shoh që Lista Serbe shantazhon programin e qeverisë, do të dalim kundër kësaj qeverie. E nëse subjekti im do të ketë qëndrim tjetër, atëherë unë do të kem qëndrim individual sepse ne nuk mendojmë të gjithë njëjtë si makushat.
Qytetarët do ta shohin se kush ka ardhur këtu me program të bëjë luftë qytetare, të gjitha këto do të shpalosen në këtë parlament, do të flasim edhe me fakte e dokumente dhe dosje, por jo me akuza. Por për ty e bosat e tu që janë taku në 2004 më 19 shtator, të gjitha do t’ua përplasim. Unë nuk jam Kadri Veseli që ju ka krijuar, e tashmë i keni dalë tepricë teknologjike. Unë mund t’i bie Albin Kurtit shuplakë por unë nuk jam rrugaç, Albin Kurti i ndërsen zagarët dhe ai ka dhënë urdhër për sulm ndaj meje”- ka thënë Zeka në Kuvend. /b.d
