Një peshkop katolik tha se do t’i kërkojë Vatikanit leje për të shuguruar burra të martuar si priftërinj deri në vitin 2028, në një deklaratë të pazakontë që mund të testojë gatishmërinë e Papa Leos për të ndryshuar mësimin e Kishës për të adresuar rënien e numrit të klerikëve.
Kisha Katolike ka ruajtur për shekuj me radhë një kler të përkushtuar ndaj beqarisë. Edhe pse kjo praktikë mund të ndryshohet nga një papë, do të ishte një ndryshim i madh doktrinar që pontifikët e kanë shmangur për dekada. Johan Bonny, peshkop i Antverpit në Belgjikë që nga viti 2009 dhe i njohur për qëndrime progresiste, tha në një letër publike drejtuar besimtarëve të tij, të publikuar të enjten, se do të bëjë “çdo përpjekje” për të shuguruar burra të martuar brenda dy viteve dhe do të identifikojë kandidatë për trajnim si priftërinj.
Peshkopët në Kishën me 1.4 miliardë anëtarë betohen për bindje ndaj papës dhe është shumë e pazakontë që ata të njoftojnë se po shqyrtojnë një veprim që mund të bie ndesh me mësimin e Kishës.
Nëse Bonny do të vazhdonte dhe do të shuguronte priftërinj të martuar pa lejen e Vatikanit, ai mund të përballej me përjashtim nga Kisha (ekskomunikim). Një zëdhënës i Vatikanit nuk iu përgjigj menjëherë kërkesës për koment mbi deklaratat e tij.
Papa Leo, i cili mori drejtimin e Kishës vitin e kaluar pas vdekjes së Papa Françeskut, nuk ka folur gjatë për mundësinë e priftërinjve të martuar, por në disa raste ka folur pozitivisht për beqarinë.
Papa Françesku, i cili ndërmori një sërë reformash gjatë 12 viteve si papë, e përjashtoi qartazi mundësinë e priftërinjve të martuar.
Në letrën e tij, Bonny tha se shugurimi i burrave të martuar do të ishte një përgjigje ndaj rënies së numrit të burrave që janë të gatshëm të ruajnë beqarinë për t’u bërë priftërinj, duke shtuar se norma aktuale e zëvendësimit është “pak mbi zero”.
“Pyetja nuk është më nëse Kisha mund të shugurojë burra të martuar si priftërinj, por kur do ta bëjë këtë dhe kush do ta bëjë,” tha ai. “Çdo vonesë duket si një justifikim.” Bonny nuk sqaroi nëse do të vazhdonte pa marrë lejen papnore.
Debati mbi lejimin e martesës për priftërinjtë katolikë ka vazhduar për shekuj, por Papa Françesku e rindezi interesin për këtë çështje duke mbajtur disa samite të peshkopëve për reforma të mundshme në Kishë.
Një samit i Vatikanit i vitit 2018 kërkoi zyrtarisht nga Françesku të lejonte shugurimin e priftërinjve të martuar, gjë që ai nuk e bëri.
Vitin e kaluar, Vatikani tha se numri i burrave që studiojnë për priftëri ka pësuar rënie të pandërprerë që nga viti 2012.
Përkrahësit e lejimit të martesës për priftërinjtë thonë se kjo do të tërhiqte më shumë burra drejt priftërisë. Kundërshtarët argumentojnë se beqaria i lejon priftit t’i përkushtohet plotësisht Kishës.
Bonny tha se dioqeza e tij mbështetet në priftërinj katolikë të huaj nga Europa Lindore dhe Lindja e Mesme, të cilët shpesh janë të martuar. Burrat e martuar lejohen të bëhen priftërinj në Kishat Katolike të ritit lindor, të cilat janë pakicë dhe më të përhapura në vendet e Lindjes së Mesme dhe Evropës Lindore.
