Besimtarët myslimanë në Kosovë po kremtojnë Fitër Bajramin, e cila shënon përfundimin e muajit Ramazan. Kjo festë e gjen vendin në një tjetër ngërç institucional si pasojë e mungesës së një marrëveshjeje politike për të zgjedhur presidentin e Republikës.
Myftiu i Kosovës, Naim Tërnava, në mesazhin e festës, tha se është e papranueshme që një situatë e tillë është si pasojë e mungesës së vullnetit për kompromis.
Myftiu i Kosovës Naim Tërnava tha: “Është e papranueshme që sot në kohë paqe dhe në kushte të një sistemi demokratik vendi ynë të ngec për shkak të mungesës së vullnetit politik për kompromis, dialog, përgjegjësi dhe për pasojë zhvillimi i shoqërisë sonë të mbetet peng i krizave politike”
Myftiu Tërnava u bëri thirrje liderëve politikë për unitet, duke theksuar se interesat e shtetit dhe të shoqërisë duhet të vihen në radhë të parë.
“Në momente të tilla kërkohet maturi e vetëdije e lartë shtetërore, kërkohet kulturë dialogu dhe mbi të gjitha kërkohet sakrificë për të vendosur interesin e vendit dhe të kombit mbi çdo interes tjetër”, u shpreh Tërnava.
Manifestimi qendror në Kosovë i Fitër Bajramit u mbajt në Xhaminë e Madhe në Prishtinë, ku besimtarë të shumtë u mblodhën që në orët e hershme të mëngjesit. Edhe ata kërkuan maturi nga liderët politikë dhe patën mesazhe paqeje e solidariteti për vendin.
Festa e Bajramit shoqërohet me vizita tek të afërmit dhe përkujdesje më e madhe për ata më në nevojë.
