Policia e Tiranës raportoi ndalimin e dy personave pasi morën peng një dentist. Uniformat blu prangosën 32-vjeçarin Erjon Basha ndërkohë proceduan në gjendje të lirë babain e tij 71-vjeçar Q. Basha.
Ata lidhën dentistin David Pina dhe kërkonin kthimin e një borxhi prej 7 mijë lekësh të rinj.
Sipas policisë, dentisti u mbajt peng nga 71-vjeçari dhe djali i tij në Rrugën “Sami Frashëri”, duke mos e lejuar të dalë nga dyqani i tij, deri në momentin e kthimit të shumës monetare prej 7000 Lekësh, shumë të cilën ky shtetas i detyrohej shtetasve të lartë përmendur.
Ngjarja ndodhi përballë drejtorisë së policisë. Ishin fqinjët ata që lajmëruan uniformat blu pas zhurmave që dëgjonin nga dentisti i marrë peng që kërkonte ndihmë.
Njoftimi i policisë
Më datë 31.01.2017, Specialistët e Komisariatit të Policisë Nr 3, kanë bërë të mundur arrestimin në flagrancë të shtetasit, Erjon Basha, 32 vjeç, banues në Tiranë, si dhe procedimin në gjendie të lirë të shtetasit, Q. Basha, 71 vjeç, banues në Tiranë.
Shtetasit e lartë përmendur më datë 31.01.2017, në Rrugën “Sami Frashëri”, kanë mbajtur pa dëshirën e tij, shtetasin D. P., 41 vjeç, duke mos e lejuar të dalë nga dyqani i tij, deri në momentin e kthimit të shumës monetare prej 7000 Lekësh, shumë të cilën ky shtetas i detyrohej shtetasve të lartë përmendur.
Materialet proceduriale i’u kaluan Prokurorisë pranë Gjykatës së Shkallës së Parë Tiranë, për veprën penale të “Heqja e paligjshme e lirisë”, parashikuar nga Neni 110/2 i Kodit Penal.
