Po zgjerohet hetimi për çështjen e basteve që ka tronditur botën e futbollit në Itali, prej disa javësh tashmë.
Në listën e të dyshuarve të prokurorisë së Torinos ka hyrë edhe Alessandro Florenzi. Mbrojtësi i Milanit akuzohet për përfshirje të paligjshme në lojëra fati apo baste, krim i parashikuar në nenin 4 të ligjit 401 të vitit 1989.
Lojtari do të merret në pyetje në ditët në vijim, teksa skandali në futbollin italian tashmë ka marrë përmasa tepër të mëdha.
Emri i Florenzit i bashkohet Nicolò Fagiolit, Sandro Tonalit dhe Nicolò Zaniolo. Dy të parët kanë negociuar tashmë me prokurorin federal një skualifikim përkatësisht dhjetë dhe shtatë muaj, ndërsa sulmuesi i Aston Villas, përpara sistemit të drejtësisë sportive, është mbrojtur gjithmonë duke pretenduar se nuk ka vënë kurrë bast për futbollin.
/a.r
