Më poshtë është shkresa e plotë për regjistrimin në zgjedhjet lokale e dorëzuar në KQZ këtë të Hënë nga grupimi i Enkelejd Alibeaj. Ishte përfaqësuesi ligjor i kësaj pale Indrit Sefa ai që e dorëzoi shkresën në Komisionin Qendror të Zgjedhjeve.
Bashkangjitur kërkesës janë një sërë dokumentesh që përfshijnë, vërtetimin për regjistrimin e partisë në Zyrën e Regjistrit të Partive Politike, autorizimi i firmosur nga kryetari ligjor i Partisë Demokratike Lulzim Basha, deklarata e angazhimit solemn që mban firmën e Enkelejd Alibeajt dhe së fundmi deklarata për hapjen e një llogarie të posaçme bankare të partisë.
Në shkresën për regjistrim në zgjedhjet e 14 Majit, janë shkruar të dhënat e subjektit zgjedhor që përfshijnë emrin zyrtar të partisë, shkronjat nistore (PD), vulën e partisë dhe adresën e selisë.
Në dokumentin e autorizimit të përgjithshëm nga Lulzim Basha, shkruhet: Unë Lulzim Basha, me funksion Kryetar i PD, lidhur me zgjedhjet vendore të 2023, në përmbushje të kompetencave të kryetarit të partisë, autorizoj ushtrimin e tyre nga nënkryetari i partisë Enkelejd Alibeaj dhe/ose Sekretari i Përgjithshëm i partisë Gazmend Bardhi, dhe/ose Sekretari për çështjet ligjore/zgjedhore Indrit Sefa.
Basha e ka firmosur këtë dokument më 18 Mars 2022, 3 ditë para se të jepte dorëheqjen nga posti i Kryetarit të kësaj force politike.
Enkeled Alibeaj do të mbledhë sot Kryesinë e tij, ku të pranishëm do të jenë: Xhelal Mziu, Selaudin Jakupllari, Lefter Geshtenja, Ramadan Lika, Eralda Bano, Merita Bakiu, Flutura Açka, Arbi Agalliu, Andia Ulliri, Flamur Hoxha, Zheni Gjergji, Gazment Bardhi dhe Saimir Korreshi.
I pyetur nga gazetarët se kush e drejton Kryesinë, duke marrë parasysh se Basha i ka dhënë autorizimin për regjistrimin e partisë në KQZ në cilësinë e kryetarit të PD, Alibeaj tha se përgjigjien do e japë pas mbledhjes.
Pyetje: Kush e drejton kryesinë sepse pamë letrën që kryetari është Basha?
Enkelejd Alibeaj: Do ta merrni vesh në prononcimin që do të kem pas takimit të mbledhjes.
Ndërkohë sa i përket grupimit që mbështet Berishën mbrëmjen e djeshme pas përfundimit të mbledhjes së Këshillit Kombëtar u depozitua kërkesa për t’u regjistruar për zgjedhjet. Aty u vendos që në zgjedhjet lokale të shkohet me koalicion. Kujtojmë që të Premten, Gjykata e Apelit vendosi që të kthejë për gjykim çështjen për vulën dhe logon e Partisë Demokratike.
/a.r
