Dy diplomatë amerikanë, ambasadori i SHBA-së Donald Lu dhe ish ambasadori amerikan Aleksandër Arvizu zhvilluan paraditen e sotme një takim me kryetarin e PD-së Lulzim Basha.
Në mesditë selia e PD-së nxorri një njoftim për shtyp lidhur me bisedën gati 90 minutash të zhvilluar në selinë PD. Nga ambasada amerikane nuk ka ende asnjë njoftim lidhur me këtë takim i cili u pasua me një tjetër në kryesinë e Kuvendit me kryetarin e Parlamentit Ilir Meta.
Mësohet se Basha në bisedën me dy diplomatët amerikanë ka vijuar të këmbëngulë se qeveria aktuale nuk ka as vullnetin dhe as mundësinë të bëjë zgjedhje të lira dhe të ndershme; Qeveria teknike rruga e vetme për zgjedhje të lira dhe të ndershme
“Për shkak të kapjes nga krimi dhe dështimit në qeverisje, kryeministri Rama minoi procesin e dekriminalizimit, projektoi kanabizimin e vendit, nuk luftoi krimin dhe nuk ka bashkëpunuar me organizmat ligjzbatuese të vendeve partnere. Prandaj kjo qeveri dhe ky kryeministër nuk kanë as vullnet dhe asnjë mundësi të garantojnë zgjedhje të lira dhe të ndershme. Interesi i tij dhe i bashkëpunëtorëve të tij është ruajtja e pushtetit me çdo kusht.
Në këto kushte, rruga e vetme për të siguruar zgjedhje të lira është krijimi i një qeverie teknike, me një mandat të qartë për zbatimin e menjëhershëm të ligjit të dekriminalizimit, parandalimin e rikanabizimit të vendit dhe luftën kundër drogës dhe parave të drogës, si dhe organizimin e zgjedhjeve të lira e të ndershme, theksoi kryetari i opozitës në takimin me zyrtarët e lartë amerikanë” thuhet në njoftimin për shtyp të selisë blu.
Pasi kanë lënë selinë PD, dy diplomatët amerikanë, ambasadori i SHBA-së Donald Lu dhe ish ambasadori amerikan Aleksandër Arvizu i janë drejtuar kryesisë së Kuvendit për të zhvilluar një takim me kreun e Kuvendit Ilir Meta. Takimi zgjati rreth 30 minuta.
Ish ambasadori amerikan Aleksandër Arvizu mban detyrën e zv/ ndihmës sekretarit të shtetit të zyrës ndërkombëtare të narkotikëve dhe forcimit të ligjit në DASH.
a.ç
