Zbardhet skema, ja si e favorizoi CEZ-in qeveria “Berisha”
Zbardhen shkresat që vërtetojnë se ish-ministri i Financave, Ridvan Bode ka urdhëruar Entin Rregullator të Energjisë për të marrë vendime në favor të kompanisë çeke, CEZ sh.a. Nënkryetari i Grupit Parlamentar të Partisë Socialiste, Erion Braçe ka bërë publike letrën e ish-ministrit të Financave, Ridvan Bode drejtuar kreut të Entit Rregullator të Energjisë, ku i kërkohet ERE-s që të ulë çmimin e energjisë, duke dëmtuar kështu Korporatën Elektronergjetike Shqiptare dhe buxhetin e shtetit, në favor të kompanisë CEZ sh.a. Ndërkohë që në një tjetër shkresë, të firmosur nga ish-ministri i Ekonomisë, Nasip Naço, po në të njëjtën ditë, kundërshtohet propozimi për uljen e çmimit të energjisë me argumentin se dëmtohet KESH-i dhe buxheti i shtetit. Por ish-kryeministri Sali Berisha deklaroi se ka qenë kryeparlamentari Ilir Meta që ka negociuar me CEZ-in, kur ishte ministër i Jashtëm, jashtë çdo lloj kompetence.
“Një padi vjen nga ish- administratori i CEZ-it, se Ilir Meta ministër i Jashtëm, e ka takuar në Pragë dhe ka negociuar me Hejçek për Kastriot Ismailajn. Deklaroj këtu me përgjegjësi të plotë, se Ilir Meta si ministër i Jashtëm nuk ka pasur asnjë tagër, asnjë detyrë, për të negociuar me CEZ-in për asnjë lloj problemi të asaj kohe.
Cilat janë motivet që e kanë shtyrë Ilir Metën të takojë në Pragë Hejçekun, të negociojë për Kastriot Ismailaj”, – ngriti shqetësimin Berisha, duke e konsideruar çështjen e CEZ-it si një nga çështjet më të mëdha të korrupsionit në vend. Por në përgjigjen e tij nënkryetari i Grupit Parlamentar të PS-së, Erion Braçe renditi 7 kompanitë e kontraktura për të mbledhur borxhet për llogari të ÇEZ-it, 3 nga të cilat me administratorë që janë pranë ish-kryeministrit. “Janë 7 kompani çeke dhe shqiptare dhe të shtata me përfitime nga 23-50. Kompania e dytë që është kontraktuar për të mbledhur borxhet e këqija, “Albania Telekomunication Union”, adresa e kompanisë, Rr. Papa Gjon Pali i dytë, ndërtesa ‘Aba Biznes Center’, kati i 14, zyra numër 7. Çfarë kati je, çfarë zyre je? Si ka mundësi që ti del ose në pallatin e këtij për të banuar ose në pallatin e këtij zotërisë me zyrë”, – iu drejtua Braçe, Berishës.
Çështja tjetër sipas Braçes, që tregon favorizimin e CEZ-it, janë vendimet e ERE-s në favor të CEZ-it të cilat janë marrë me urdhër të ish- ministrit të Financave, Ridvan Bode. Më 5 prill 2012, ish- ministri i Financave, ka miratuar sipas një dokumenti zyrtar, uljen në 2.2 lek për kilovaorë, për furnizimin e CEZ-it nga KESH, nga 2,83 kilovatorë që ishte në fuqi ndërkohë, si dhe njohjen e borxhit të keq në masën 16.8 për qind të kësaj kompanie, që buronte nga kontrata e shitjes. “Me letrën tuaj Nr .281/2, datë 30 mars 2012, ju na informoni për disa probleme që kanë lidhje me situatën e vështirë me të cilën po përballet sektori elektroenergjetik. Nisur nga kjo situatë ju propozoni: Njohjen e borxhit të keq prej 16.85%; Mbajtjen e tarifave për konsumatorët të pandryshueshme; Mbajtjen në nivelin 2.2 lek/kilovatorë të tarifës së KESH-it. Për sa më sipër, Ministria e Financave, në cilësinë e garantorit mbështet skemën e propozuar nga ana juaj për tejkalimin e kësaj situatë”, citoi Braçe shkresën që Bode i dërgon kreut të ERE-s, Sokol Ramadani.
Por ndërkohë ndryshimi i çmimit të shitjes së energjisë nga KESH te CEZ-i nuk mbështetet nga ish-ministri i Ekonomisë Nasip Naço, i cili po përmes një dokumenti zyrtar, hedh poshtë propozimet e ministrit të Financave Ridvan Bode. “Duke qenë se të drejtën dhe detyrimin ligjor për vendimmarrje të këtij karakteri, me ligjin nr. 9072, datë 22.5.2003 “Për sektorin e energjisë elektrike” e ka vetëm ERE dhe duke qenë se vendimet e mësipërme janë marrë pas analizave dhe procedurave të kryera prej jush për një kohë të gjatë, ne nuk mund të shprehemi për propozimet e bëra nga ana juaj, pasi në letrën tuaj ato nuk janë të argumentuara sesa është vlera që dëmtohet KESH-i dhe buxheti i shtetit duke qenë se indikatorët që ju i referoheni janë të shprehura në përqindje”, – thuhet në shkresën e firmosur nga Naço për kreun e ERE-s, Sokol Ramadani, po të njëjtën ditë me shkresën e Bodes. Të gjitha këto dokumente, sipas Braçes duhen hetuar. “Patjetër kërkon hetim ajo shkresa e ministrit në fjalë që në tejkalim të çdo kompetence urdhëron ERE të miratojë vendime totalisht në favor të CEZ. Favoret e dhëna këtij zotërisë janë mbi 220 milionë euro”, – tha ai.
