Një ngjarje e rëndë ka ndodhur mbrëmjen e djeshme (12 janar) te “Pallati me Shigjeta”, ku një 56- vjeçar është qëlluar për vdekje teksa ishte në makinën e tij.
Burime policore bëjnë me dije se viktima është identifikuar si Bujar Nasufi dhe është ekzekutuar në momentet që po futej te dera e shtëpisë. Në vendngjarje janë gjetur 6 gëzhoja, të cilat besohet se i përkasin armës me të cilën është vrarë Nasufi.
Autori, që dyshohet se ka qenë vetëm një, ka qenë i maskuar me një kapuç dhe është larguar me motor drejt zonës së Selitës. 56-vjeçari ka humbur jetën teksa po transportohej drejt Spitalit të Traumës, pasi nuk u ka mbijetuar plagëve të marra në pjesën e sipërme të trupit. Sipas informacioneve paraprake dhënë mbrëmë nga policia e Tiranës, mësohet se viktima ka një mobilieri së bashku me vëllain e tij, ndërsa mësohet se nuk ka asnjë precedent penal.
“Më datë 12.01.2025, rreth orës 20:40, tek ‘Pallati me Shigjeta’ në rrugën ‘Myrte Zeneli’, është qëlluar me armë zjarri në drejtim të një automjeti me drejtues shtetasin Bujar Nasufi rreth 56 vjeç, i cili si pasojë ka humbur jetën”, – informoi policia e kryeqytetit.
Një grup i posaçëm hetimor, nën drejtimin e Prokurorisë, ndodhet në vendngjarje dhe vazhdon punën për sqarimin e rrethanave të ngjarjes, identifikimin dhe kapjen e autorëve të dyshuar. Shërbimet e Policisë kanë ngritur pika kontrolli dhe po ushtrojnë kontrolle në zonë për kapjen e autorit. Informacion më të detajuar mbi këtë ngjarje do të japim në vijim pas veprimeve hetimore paraprake.
HETIMET
Ka qenë një telefonatë e shkuar në sallën operative që ka lajmëruar për një plagosje në zonën e Selitës. I plagosuri, i cili ka qenë me pak shenja jete, është nisur menjëherë në drejtim të spitalit të Traumës, por pa mundur t’u mbijetojë plagëve.
Policia që ka shkuar në vendin e ngjarjes pasi ka ngritur planin e masave ka rrethuar zonën dhe më pas edhe gjithë Tiranën. Dyshohet se një motor i zi, që ka karakteristikat e mjetit që dyshohet që u pa në vendin e ngjarjes kishte marrë drejtimin e Selitës, ndërkohë që policia sërish mblodhi vetëm gëzhojat në vendin e ngjarjes. Autori ose autorët e kanë pritur Nasufin në afërsi të shtëpisë, vend ku ai ka ulur shpejtësinë e mjetit pasi do të futej në portën e jashtme të banesës së tij.
Atentatori e ka gjuajtur 6 herë me armë zjarri, pistoletë, në një distancë fare të afërt, për shkak se ia ka mundësuar jo vetëm errësira por edhe moti me shi.
Policia e Shtetit bën me dije se viktima është një person tërësisht i panjohur për ta pasi ai nuk rezulton me asnjë precedent të mëparshëm penal. Po ashtu, bëhet fjalë se as nga familja e tij nuk ka ndonjë person problematik, por mënyra se si është kryer atentati lë të dyshohet se vrasja është e një stili mafioz dhe e mirorganizuar.
Grupi hetimor që ka marrë në duar ngjarjen kërkon të zbulojë shkaqet pikërisht tek e shkuara e viktimës dhe e njerëzve të tij të afërt për të mësuar se cili ka qenë motivi i ekzekutimin të mbrëmshëm.
