Në kërkesën që Prokuroria i ka drejtuar Gjykatës së Shkallës së parë për caktimin e masës ndaj Maliq Markut, janë shkruar me detaje dhe rrethanat e vrasjes së dy ditëve më parë në Laknas.
Kujtojmë se nga kjo ngjarje mbeti i vrarë Shefqet Hasa dhe u plagos Ismet Keça, të dy fqinjë të Maliq Markut. Ky i fundit ekzekutoi me armë zjarri Hasën me plot 5 plumba. E gjitha nisi për kanalizimet e ujërave të zeza në lagjen e tyre.
Sipas prokurorisë, Maliq Marku ka qëlluar ndaj Hasës deri sa ka mbaruar të gjithë fishekët e karikatorit e më pas është futur në banesë për ta mbushur sërish armën.
“Personi nën hetim ka qëlluar derisa sa arma e tij i ka mbetur e hapur, pra deri në mbarimin e gjithë fishekëve që kishte në kreherin e armës së tij. Pasi ka qëlluar gjithë fishekët që kishte në armën e tij personi nën hetim është futur në banesën e tij ku rimbushur krehërin e pistoletës së tij me fishekët që kishte në xhep e ka vendosur në pistoletë dhe ka mbushur pistoletën”, bën me dije prokuroria.
Mësohet po ashtu se ka qenë ndërhyrja e një banori tjetër të lagjes ajo që ka parandaluar thellimin e ngjarjes. Pasi Maliq Marku qëlloi ndaj Ismet Keçës 3 ose 4 herë, shtetasi me inicialet I.K ka bërë të mundur t’i devijojë pistoletën duke ja ulur me drejtim nga toka.
“Pas këtyre te shtënave personi nën hetim përsëri ia ka drejtuar pistoleten Ismetit, por shtetasi I.K në këto momente i ka kapur të dyja duart bashkë me pistoletën Maliqit, duke ja ulur poshtë me drejtim për nga toka, ku në këtë moment Maliqi ka qëlluar dhe nje herë të vetme në drejtim të tokës”, thuhet më tej.
Në vendngjarje janë gjetur 7 gëzhoja pistolete, ndërsa nga kontrolli i banesës së Markut janë sekuestruar 1 shkop gome, 3 fishekë të armëve të gjakut dhe një tub metalik.
Maliq Marku, sipas Prokurorisë, ka konsumuar dy vepra të rënda penale, atë të “vrasjes në rrethana të tjera cilësuese kundër dy ose më shumë personave” dhe “armëmbajtjes pa leje”.
/a.r
