Dy ditë pas ngjarjes së rëndë në zonën e Laprakës, ku mbetën të plagosur katër persona nga të shtënat me armë zjarri në lokal, është zbardhur edhe dinamika e ngjarjes. Gjithçka ka nisur tri ditë më parë, ku pronari i lokalit, Eljon Leka, është konfliktuar me njërin prej vëllezërve nga Puka, përkatësisht me Astrit Seferin, 32 vjeç. Ndërkohë, hetimet ende nuk kanë zbuluar shkakun e konfliktit mes Lekës dhe Seferit.
Dy ditë më parë, kur edhe ndodhi ngjarja, Astrit Seferi, i ndihmuar edhe nga vëllai i tij, Arben Seferi, 35 vjeç, kanë shkuar së bashku te lokali i Eljon Lekës, që ndodhet në rrugën “Gjergj Legisi” në zonën e Laprakës.
Eljon Lika ka dalë jashtë nga lokali ku është përballur me dy vëllezërit. Në momentin që pronari i lokalit ka parë armën, ka tentuar të largohet me shpejtësi, duke u futur në mjediset e lokalit. Ky ka qenë edhe momenti ku është hapur zjarr në lokal nga dy vëllezërit.
Dyshimet janë se ata kanë tentuar të vrasin pronarin e lokalit, me emrin “Arlind”, por kanë plagosur atë vetë, së bashku me tre klientë të tjerë, të cilët janë: Avni Biberi, 46 vjeç, Bujarin Mrisha, 39 vjeç, dhe Bledar Gusturami, 33 vjeç.
Që prej tri ditësh, tre vëllezërit janë në kërkim nga Policia, por ende nuk është kapur asnjëri prej tyre. Gjithashtu, mësohet se edhe pronari i lokalit është me origjinë nga Puka, ashtu sikurse dy autorët. Sa u përket të plagosurve, ata vazhdojnë të jenë në spital, jashtë rrezikut për jetën.
SHERRI
“Lufta” në lokalin e familjes Leka, tek ish-kombinati “Josif Pashko” në Laprakë, dyshohet se ka ndodhur pas një konflikti që Eljon Leka ka pasur me vëllezërit Seferi. Ky konflikt ka ndodhur dy ditë më parë, në lokalin e dy vëllezërve, që ndodhet pranë gjimnazit “Aleks Buda”, po në Laprakë.
Nuk dihet me saktësi se për çfarë arsyesh ka ndodhur përplasja mes tyre, por megjithëse ishte menduar si i mbyllur ky konflikt, gjakrat janë nxehur kur palët u panë rastësisht në rrugë. Rruga nga ku janë larguar autorët është e monitoruar nga shumë kamera sigurie që kanë filmuar ngjarjen.
Dy vëllezërit janë fiksuar që largohen me shpejtësi nga vendngjarja, me një automjet tip “Mercedes”, me ngjyrë gri. Policia ka ushtruar kontrolle gjatë gjithë natës, fillimisht në lokalin që ata kanë në pronësi dhe në banesat po në të njëjtën zonë.
DËMET
Nga të shtënat që ndodhën në lokal, mësohet se dera kryesore e tij ishte thyer e gjitha, pasi ishte prej xhami. Gjithashtu, edhe një automjet tjetër që gjendej aty i parkuar, kishte marrë disa plumba nga të shtënat. Edhe dëshmitarët kanë pohuar se ishin në dijeni të një konflikti të pronarit të lokalit me disa patriotë të tij, por për arsyen e konfliktit nuk kanë pasur dijeni.
Pas ngjarjes pati edhe një prononcim të drejtorit të Policisë së Tiranës. I pyetur për motivet e ngjarjes, drejtori i Policisë shpjegoi se bëhet fjalë për një konflikt. “Ka ndodhur një konflikt dje dhe sot, pasi janë parë, janë konfliktuar dhe ndodhi ngjarja. Autorët janë dy persona që i kemi në ndjekje”, u shpreh dje Veliu nga vendi i ngjarjes. /panorama
ma.me
