Ndërsa Krimet e Rënda pritet të japin sot masën e sigurisë për shtetasin grek Efthymiou Efthymious, të dyshuarin kryesor si ekzekutorin e Devi Kasmit mbrëmjen e 29 Janarit, teksa ishte nën shoqërinë e Mario Meshinit, mësohen të tjera detaje. 
E stacionuar në këtë gjykatë, gazetarja Klodjana Lala konfirmon për “BalkanWeb” se për ngjarjen janë marrë në pyetje edhe dy kunetërit e Domart Konjarit, emri i të cilit u përmend nga policia i dyshuar si porositësi i vrasjes së Kasmit, nisur nga konfliktet e vjetra mes tyre.
Por sa më shumë orët kalojnë, aq më të pakëta janë dyshimet që e lidhin Domartin me ngjarjen. Siç konfirmon Lala për “BalkanWeb”, kunetërit e këtij të fundit kanë thënë se nuk kanë dijeni për ngjarjen, e aq më pak Domarti, me të cilin ka qënë mik dikur.
Lala tha ndër të tjera se avoktati mbrojtës i grekut të arrestuar për vrasjen, Saimir Visha ka kërkuar lirimin e Efthymiou Efthymious, i cili ka mohuar të ketë lidhje me ngjarjen që nga arrestimin.
Në dëshminë e tij para uniformave blu, 41-vjeçari grek ka pranuar se ka njohje me njërin nga të akuzuarit për ngjarjen, shtetasin Aurel Hoxhallari. Por pavarësisht kësaj njohje, ai këmbëngul se nuk ka lidhje me vrasjen dhe viktimën.
