Në emisionin Top Tema, kryeministri Zoran Zaev u shpreh se është i gatshëm të mbështesë kandidatin e BDI për komunën e Çairit, sepse vlerëson se është zgjidhje e mirë dhe ka marrë edhe përkrahjen e degës së LSDM-së nga kjo komunë.
“Gjasat janë të larta që me BDI-në të garojmë si koalicion në më shumë komuna, si dhe të marrim përkrahjen e tyre për Bashkinë e Shkupit që në rrethin e parë, e jo të pritet në rrethin e dytë si kalkulim politik”, tha Zaev në Telma.
Për kandidaturën e Ministrit të shëndetësisë, Arben Taravari, Zaev tha se nëse nuk fiton në garën për komunën e Gostivarit, nuk do ta ketë rëndë ta mbajë atë si ministër në Qeveri, sepse beson që është kuadër cilësor, por theksoi se ka kuptim për Aleancën për shqiptarët, sepse është parti e re që kërkon mënyrë për të arritur sukses.
Lideri i LSDM-së, poashtu tha se do të kenë kandidatë të tyre në Kondovë, Likovë, Strugë dhe komuna tjera, ku pret që edhe votues maqedonas edhe shqiptarë të votojnë për kandidatët e tyre të kombit shqiptar.
Zaev theksoi se nuk mund të ndalojë partnerët e koalicionit të kandidojnë ministrat ose zv.ministrat e tyre në komuna, sepse dëshiron që të mbizotërojë liria dhe zgjidhja e tyre personale, por tha se duhet të ketë kufinj të caktuar që të mund të vazhdojë dinamika e reformave në Qeverinë e re.
a.ç
