Sulmuezi brazilian, Hulk, është akuzuar për grushtim të një trajneri të skuadrës rivale, të shtunën, ndërsa ekipi rival ka akuzuar atë se përçmon kinezët. Mirëpo, skuadra e Hulkut, Shanghai SIPG, ka mohuar kategorikisht këtë.
Hulk, që iu bashkua Shanghait nga Zeniti për rekord aziatik prej 55 milionë eurosh në qershor të vitit të kaluar, është raportuar se ka grushtuar ndihmëstrajnerin e skuadrës Guizhou Zhicheng, Yu Ming, në pauzë mes pjesëlojëve në fitoren 3:0 të Shanghait në ndeshjen e së shtunës, shkruan “Daily Mail”, transmeton “Koha Ditore”.
“Pati disa debate pas pjesës së parë dhe trajnerët e tyre morën iniciativën për të na fyer gjatë ndeshjes dhe kjo ishte arsye pse bëmë fjalë me ta”, ka thënë kryetrajneri i Guizhou, Li Bing, që pritet të zëvendësohet nga spanjolli Gregorio Manzano.
“Kjo zgjati deri në pauzë mes pjesëlojëve, dhe më vonë, në korridor, Hulk shau ndihmëstrajnerin tonë në gjuhën angleze. Ne u fjalosëm me të dhe ai grushtoi ndihmëstrajnerin Yu Ming dhe Yu ra përtokë. Lojtarët e huaj vijnë këtu për të ndihmuar në zhvillimin e futbollit kinez, por pavarësisht se sa mirë luan, nuk mund të përçmosh kinezët, e lëre me të rrahësh trajnerët tanë kinezë”…(b.an)
