Është dashuruar në moshën 16-vjeçare, por ndonëse kanë kaluar shtatë vjet që atëherë, Xhensila Myrtezaj vazhdon të jetë në krahët e aktorit Bes Kallaku. Romanca e tyre është një ndër më të gjatat në historinë e showbiz-it. Dhe duket se dashuria e tyre do të jetë nga ato historitë me fund të lumtur.
Këngëtarja ka zbuluar ditën e djeshme se po përgatitet për martesën. Në emisionin “Rudina”, Xhensila ka thënë se do të martohet vitin që vjen, ndërsa ka refuzuar të zbulojë datën, duke sqaruar se është supersticioze.
“Vitin që vjen do të martohemi. Uroj të jetë dasmë intime, por do të jetë e pamundur. Jam ende shumë e qetë dhe s’më kanë kapur emocionet që kapin nusen. Uroj të na shkojë çdo gjë siç e kam ëndërruar. Sot provova për herë të parë fustanin e bardhë. U emocionova shumë! Unë dua që në të ardhmen të kem një familje të madhe. I dua shumë fëmijët, akoma më shumë kohët e fundit. Por jam e fokusuar drejt karrierës dhe një fëmijë nuk është në planet e afërta”, – është shprehur këngëtarja.
Sa i takon raportit me aktorin e “Portokalli”-së, Xhensila është shprehur: “Ne bëjmë bashkë 7 vite. Me të jam lidhur 16 vjeçe. Ai është njeri me zemër të madhe dhe më ka dashur me shumë pastërti. Na pëlqen shumë të udhëtojmë. Sapo mbarojmë angazhimet, planifikojmë dhe ikim diku të dy e çmallemi. Duke qenë se Besi është i angazhuar këtu, unë mundohem sa mbaroj koncertin të pres biletën e të fluturoj për te Besi”.
ma.me
