Taulant Xhaka, ka dhënë një intervistë me tabloidin më të lexuar zviceran, “Blick”. Aty, mesfushori energjik i kuqezinjve shpreh emocionet para ndeshjes Shqipëri-Zvicër, që do të luhet më 11 qershor, në kuadrin e Grupit A të fazës finale të “Euro 2016”. Ai nënvizon se Zvicra dhe Franca janë favorite për t’u kualifikuar në grup, sepse kanë lojtarë më të talentuar, por kompaktësia e grupit është ajo që do t’i japë suksesin Shqipërisë.
Taulant Xhaka, vëllai yt Graniti thotë se është shumë e vështirë të luajë kundër gjakut të tij. A do donit edhe ju që të mos kishte një përplasje me Zvicrën?
Po, e tërë situata është e vështirë. Jo vetëm për mua, por për të gjithë familjen time. Babai im, Ragipi, thotë se është me fat që ka dy duar, për të ngritur gishtin e madh për secilin.
A do hezitosh për t’i ndërhyrë vëllait tënd me këmbë gjatë ndeshjes?
Jo, nuk do ndryshoj stilin e lojës, në fund të fundit dua që të fitojë Shqipëria. Nuk ka rëndësi nëse luaj kundër vëllait tim. Por natyrisht nuk dua ta lëndoj as atë dhe askënd tjetër.
Ju keni luajtur njëherë kundër vëllait. E mbani mend atë duel?
Natyrisht, ishte diçka e veçantë për të dy ne. Por atëherë luaja si mbrojtës i djathtë dhe ai ishte në mesfushë. Pra nuk kishte shumë dyluftime mes nesh. Kjo do ndryshojë në Europian.
Çfarë mund të bëni me Shqipërinë?
Shumë gjëra. Ne mund të mposhtim çdo kundërshtar, kemi fituar në kualifikuese mes të tjerash edhe kundër Portugalisë. Sigurisht Zvicra e Franca janë favoritët në grup. Të dy ekipet kanë ndoshta individë më të mirë se ne në grup. Por ajo që na diferencon është kohezioni i ekipit.
Në total janë 12 lojtarë në kombëtaren shqiptare, që janë formuar në Zvicër. A do vijë edhe Shani Tarashaj dhe Albian Ajeti me ju?
Nuk mund të them asgjë. Tentoj të mos ndikoj në këtë drejtim. Ata duhet të vendosin së bashku me familjet e tyre.
Shkëlzen Gashi, duhet të ndryshojë ekip, ndoshta, të aktivizohet rregullisht, që të mos humbasë finalet e Kampionatit Europian…
Ai duhet ta dijë vetë se çfarë të bëjë.
A mund të largoheni nga Basel këtë verë?
Unë kam një kontratë me Basel deri në vitin 2018 dhe jam mirë këtu. Kam pranë familjen time, miqtë e mi, ndiej besimin e trajnerit. Por, në mënyrë të qartë, nuk mund ta përjashtoj një lëvizje jashtë vendit, në parim.
Si i keni raportet me Renato Steffen? Gjatë shtatorit ju u zutë keq.
E kemi harruar. Tani kuptohemi shumë mirë me njëri-tjetrin. Jemi tipa të ngjashëm.
Telesport
