Ministri i Brendshëm Fatmir Xhafaj tha sot se qeveria është e vendosur që forca e ligjit të sundojë.
Në fjalën e tij gjatë takimit me partnerët ndërkombëtarë, Fatmir Xhafaj tha se krimi i organizuar nuk do të ketë të ardhme në Shqipëri.
Xhafaj tha se si ministër, ai ka pranuar ta marrë këtë detyrë kushtetuese me qëllimin e lartë që të ketë më shumë siguri publike. Sipas tij ky është qëllimi i vetëm i punës së Ministrisë së Brendshme, dhe se ky institucion nuk është në sfidë me asnjë individ konkret.
“Sot fillon një rrugë tërësisht e re, rrugë në të cilën krimi i organizuar nuk do të mund të bashkëudhëtojë. Ne sot shpallim fillimin e një luftë multifrontale dhe intensive ndaj krimit të organizuar. Krimi i organizuar nuk ka markë shqiptare dhe as nuk është emblema e shqiptarëve. Nuk jemi të vetmit në rajon dhe botë të trazuar që e vuajme këtë plagë. Por pavarësisht progresit, jemi akoma larg një shoqërië ku sundon ligji dhe drejtësia. Sot kjo qeveri ka kuptuar rrezikun e krimit për përparimin ekonomik dhe prosperitetin e qytetarëeve. Sot marrim përgjegjësi për ta bërë këtë luftë me vendosmëri. Krijimi i task-forcës speciale është akt kuptimplotë në luftën kundër krimit të organizuar. Po ndryshojmë tërësisht qasjen reaguese dhe vepruese ndaj krimit. Krimi i organizuar nuk do të ketë të ardhme në Shqipëri, do të shkatërrojmë rrjetët kriminale, infrastruktutën e tyre dhe fuqinë ekonomike. Unë dhe ekipi im nuk kemi sfidë me askend, vetëm me qëllimin e lartë për rend dhe siguri për qytetarët tanë. Do bëjmë të pamundërën që të fitojmë luftën me krimin e organizuar. Ndonëse kriminaliteti ka bërë përpjekje të bashkohet në organizata të strukturuara, ai akoma nuk ka mundur të strukturohet. është koha për t’i shpallur një luftë totale dhe moslejimin e fuqimit ekonomik të krimit” – tha Fatmir Xhafaj. /JavaNews/b.d
