Nga Lezha në Forumin për Sigurinë Publike, ministri i Brendshëm Fatmir Xhafaj deklaroi se Policia e Shtetit ka nisur një operacion antiskifter, i cili ka në qendër të tij grupe nga Laçi dhe Lezha të cilët janë përfshirë në aktivitete kriminale jashtë vendit, kryesisht në fushën e vjedhjeve dhe grabitjeve. Sipas tij, këta persona kriminalë jo vetëm shkaktojnë probleme për vendet e BE, por nxijnë dhe krijojnë një imazh shumë të keq dhe për vendin.
“Ne kemi nisur me Gjermaninë dhe vende të tjera operacionin anti-skifter. Bashkë me policitë e vendeve të tjera do të japim edhe një faqe publike për sendet e vjedhura. Ndëshkimi do të jetë edhe për ata atje, por edhe këtu. Jo më larg se sot, pasdite policia ka dy operacione me Spanjën dhe Gjermaninë, me aktivitet të rëndë kriminal. Do të thellojmë hetimin për pronat në bregdet, jo vetëm në Lezhë, por edhe në Durrës dhe në Vlorë. Gjithashtu të gjitha akset rrugore do të monitorohen me kamera, deklaroi Xhafaj.
Ai u shpreh se policia nuk mund të përballojë e vetme të gjitha problematikat, duke kërkuar bashkëpunimin me qytetarët, qeverisjen vendore, komunitetet fetare, por edhe kryetarët e fshatrave.
“Ne kemi detyrat tona, por nuk mund ti bëjmë të vetëm, pa pjesëmarrjen e qytetarëve. Nuk mund të vendosim policë në cdo rrugë fshati, shezlon, apo hyrje pallati. Nuk mund të ketë një polici për papaqin dhe një polici tjetër për atë që lëviz me makina të shtrenjta dhe i bën karshillëk shtetit. Të ndalohen ata që xhiroja gomat dhe vendosin në rrezik jetën e qytetarëve. Policia është ndër institucionet më të besueshme në Shqipëri, kjo është meritë e atyre që punojnë, por ata që nuk e meritojnë duhet të largohen”, deklaroi Xhafaj.
ma.me/javanews.al
