Në fjalën e tij në seancën plenare, kreu i komisionit parlamentar të ligjeve, deputeti socialist Fatmir Xhafaj është treguar kritik nda administratës tatimore dhe doganore të vendit. Fatmir Xhafaj tha se dështimi i këtyre institucioneve në mbledhjen e taksave nuk mund të riparohet me ndryshime në kodin penal.
“Fakti që sot administrata tatimore dhe doganore nuk është efektive në mbledhjen e taksave, tatimeve dhe detyrimeve doganore, nuk do të thotë që ato të bëhen efektive duke ndryshuar masivisht apo qoftë edhe një dispozitë të vetme të Kodit Penal. Të ndryshosh Kodin Penal dhe të ndëshkojmë edhe më fortë shkelësit e ligjit penal, por të ndëshkojmë po aq ashpër edhe ata që menaxhojnë këtë sistem dhe që në rastin më të mirë me paaftësinë e tyre kanë lejuar një situatë të tillë abuzive. Shkelësi i parë i ligjit dhe më i rrezikshmi për shoqërinë është ai që ka për detyrë kontrollin e zbatimit të ligjit”- tha kreu i komisionit të ligjeve.
Duke u treguar kritik në lidhje dhe me ndryshimet e shumta që i janë bërë këtij kodi, Xhafaj theksoi se në ligj është krijuar një amulli e madhe.
” Viti 1995 e deri sot Kodi penal shqiptar është përballur me një numër të madh ndryshimesh dhe shtesash. Ndërhyrjet e shumta që i janë bërë dhe po i bëhen Kodit Penal, vlerësohen se kanë prekur mbi 70 % të dispozitave të këtij kodi, gjë që ka shkaktuar cenim të strukturës së tij dhe të balancës së dënueshmërisë së veprave penale të parashikuara prej tij duke shtuar paragrafë mbi nënparagrafë të cilat kanë shkaktuar amulli dhe ndërprerje të vijës logjike midis shumë neneve të këtij kodi. Kjo dukuri nuk është pozitive dhe ka nevojë për reflektim. Duhet të bëjmë kujdes të madh që mos të bëjmë ligje të panevojshme që në fakt do na çojnë në dobësimin e ligjeve të nevojshme”, tha Xhafa.
