Kryeministri i Serbisë, Aleksandar Vuçiç zhvilloi një takim të enjten në Rashkë me përfaqësuesit politik të serbëve të Kosovës, ku u diskutua për situatën më të re dhe rezultatin e bisedimeve me përfaqësuesit shtetëror të Kosovës që janë mbajtur mbrëmë në Bruksel.
Siç raporton agjencia e lajmeve Tanjug në takim kanë shkuar përfaqësuesit e Listës Serbe dhe kryetarët e komunave të veriut të Kosovës.
Gjatë takimit, kryeministri i Serbisë, Aleksandar Vuçiç u ka kërkuar atyre që të qëndrojnë të qetë, pasi siç ka thënë ai, “ne do të luftojmë për të vërtetën”. Vuçiç tha për mediat serbe se “ne kemi pranuar gjithçka që ata kanë propozuar, por jemi aty ku diçka nuk pranojmë, që të jemi fajtorë për gjithçka, e në një gjë të themi jo, që të jemi përgjegjës për të gjitha”.
“Mesazhi im për serbët është, të mos bien pre e provokimeve, paqja është në interesin tonë. Serbët të jenë të qetë, se ne do të luftojmë me të vërtetën”, ka thënë Vuçiç, raporton Tanjug.
Vuçiç tha se Goran Rakiç pranon që të shembet muri, jo sepse mendon keq për popullin e tij, ose sepse është frikacak, por sepse dëshiron të ruaj paqen.
Kurse kryetari i Komunës së Mitrovicës Veriore, Goran Rakiç theksoi se Bashkimi Evropian është e qartë se haptazi po mban anën e komunitetit shqiptar dhe sipas tij, serbët e Kosovës janë të shqetësuar për familjet e tyre dhe jetën e tyre./KosovaPress/b.d
