Media në Siri ka raportuar se në betejën e fundit në mes të militantëve të ISIS dhe forcave ushtarake siriane në periferi të Aleppos kanë mbetur të vdekur 28 xhihadistë, midis tyre edhe pesë drejtues të brigadës së lidhur me Al-Qaedan.
Ndërkaq, sipas “Al-Ahed News”, një nga këta të vrarë është edhe 22-vjeçari nga Prizreni, Hamdi Krusha, i cili njihej në Siri me pseudonimin Sulejman El-Albani, transmeton Koha.net.
Ky është shqiptari i dytë i vrarë në pak kohë në Siri, pas raportimit për vrasjen e Almir Dacit.
Raportohet se familja e viktimës, që jeton në lagjen “Jeta e Re” në Prizren, është njoftuar për lajmin pasditen e së dielës nga një bashkëluftëtar i Hamdiut, në Siri, gjithashtu nga Prizreni.
Vrasja e Krushës e çon në 50 numrin e kosovarëve të vrarëve në luftimet në Siri dhe Irak, ndërkohë që të dhënat flasin për mbi 70 luftëtarë tjerë nga Kosova të rreshtuar përkrah organizatave terroriste ISIS e Al-Nusra.
