Një gjeneral i nivelit të lartë në forcat e armatosura ruse është vrarë në një shpërthim në Moskë. Gjenerali Igor Kirillov, kreu i Forcave të Mbrojtjes Bërthamore, Biologjike dhe Kimike (NBC), po largohej nga një bllok banimi herët të martën në mëngjes kur një bombë e fshehur në një skuter elektrik shpërtheu, tha Komiteti Hetimor i Rusisë.
Ai u vra jashtë një pallati rreth 7 km në juglindje të Kremlinit.
“Igor Kirillov, kreu i forcave të mbrojtjes nga rrezatimi, kimike dhe biologjike të forcave të armatosura të Federatës Ruse, dhe ndihmësi i tij u vranë,” tha komiteti hetimor.
Fotografitë e postuara në kanalet ruse të Telegramit treguan një hyrje të thyer në një ndërtesë të mbushur me rrënoja dhe dy trupa të shtrirë në borën e njollosur me gjak.
Në tetor, Mbretëria e Bashkuar vendosi sanksione ndaj Kirillov, duke thënë se ai kishte mbikëqyrur përdorimin e armëve kimike në Ukrainë dhe kishte vepruar si një “zëdhënës i rëndësishëm për dezinformimin e Kremlinit”.
Të hënën, shërbimi sekret i Ukrainës, SBU, e akuzoi atë në mungesë, duke thënë në Telegram se ai ishte “përgjegjës për përdorimin masiv të armëve kimike të ndaluara”.
Komiteti Hetues, autoriteti kryesor hetimor i Rusisë, tha se kishte “hapur një çështje penale për vrasjen e dy ushtarakëve”.
Hetuesit, ekspertët mjeko-ligjorë dhe shërbimet operative po punojnë në vendin e ngjarjes”, thuhet në njoftim.
Po kryhen veprimet hetimore dhe kërkimi operativ për zbardhjen e të gjitha rrethanave të krimit.
Trupat ruse të mbrojtjes radioaktive, kimike dhe biologjike, të njohura si RKhBZ, janë forca speciale që veprojnë në kushte të kontaminimit radioaktiv, kimik dhe biologjik.
