“Arrest me burg” është masa e sigurisë e dhënë ditën e sotme nga Gjykata e Kavajës, për autorin e dyshuar të vrasjes së taksistit Idriz Karriqi.
Në bazë të provave që rëndojnë ndaj tij 24- vjeçari Musa Saraçi do të qëndrojë mbas hekurave në vijim të hetimeve.
Ndërkohë po sot gjykata vendosi “detyrim paraqitje” për Alush Batushën, i cili është pronari i një pike grumbullimi makinash në Kavajë.
Batusha akuzohet se pak orë pas vrasjes së taksistit Idriz Karriqi, ka blerë nga autori i krimit automjetin tip “Mercedes Benz”, në pronësi të viktimës kundrejt një shume monetare prej 27 mijë lekë të reja, pa mbajtur asnjë dokumentacion që vërtetonte pronësinë e mjetit.
Në lidhje me ngjarjen në cilësinë e provës materiale u sekuestrua automjeti tip “Mercedes Benz” me targa KJ 6844 A.
Batusha akuzohet për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”.
Trupi i pajetë i Idriz Karriqit u gjet në orët e vona të mbrëmjes së të enjtes së kaluar, i goditur me thikë, në anë të rrugës, në fshatin Greth, komuna Kryevidh mes disa shkurreve.
Karriqi ishte prenotuar për shërbimin taksi nga Musa Saraçi, rreth orës 09.00 të 14 dhjetorit përpara spitalit të Kavajës dhe më pas ka humbur dhe kontaktet me familjarët e tij.
Dyshohet se në fshatin Greth të Kryevidhit, Musa Saraçi, e ka goditur me mjete prerëse Karriqin, dhe më pas i ka marrë mjetin me të cilin është larguar. Më konkretisht ai i ka kërkuar viktimës që ta çojë në grykëderdhjen e lumit Shkumbin ku dhe e ka vrarë duke e therur me thikë, për t’i marrë makinën më pas.
Ndërkohë zbulimi i Saraçit u bë të enjten pasi e ka çuar mjetin e grabitur në një servis makinash për ta shitur, ku dhe është pikasur nga policia duke u arrestuar.
Jo vetëm kaq por kamerat e sigurisë pranë zonës ku Karriqi u prenotua si taksi, kanë filmuar teksa ai ka hipur në makinë me Idrizin në çastet e fundit që i ndjeri është parë, duke identifikuar të dyshuarin./noa/a.k
