Prokuroria e Kavajës ka përfunduar hetimet dhe ka dërguar për gjykim dosjen e Xhevat Saraçi, i akuzuar për veprën penale të “Vrasjes në rrethana cilësuese” dhe “Armëmbajtje pa leje”.
Xhevat Saraçi akuzohet se ka vrarë me armë zjarri shtetasin Ismet Xhani, si edhe ka tentuar të vrasë shtetasin Marjo Xhani, pas një konflikti për prerjen e një plepi, ngjarje e ndodhur në 4 janar 2016 në fshatin Luz i Madh të Kavajës.
Gjatë hetimit, i pandehuri i është nënshtruar edhe ekspertizës psikiatriko-ligjore, nga e cila ka rezultuar se ai nuk vuan nga ndonjë sëmundje e shëndetit mendor, raporton Shqiptarja.com.
Në datë 4 janar 2016, Komisariati i Policisë Kavajë është vënë në dijeni në lidhje me një ngjarje kriminale të ndodhur në fshatin Luz i Madh Kavajë. Kështu, nga kryerja e veprimeve të para hetimore, ka rezultuar se është vrarë me armë zjarri shtetasi Ismet (Isuf) Xhani si edhe është tentuar të vritet shtetasi Marjo Xhani.
