Ministria e Brendshme ka prezantuar një paketë ndryshimesh në Kodin Penal, sa i takon aksidenteve me pasojë vdekjen, ku parashikohet dënimi me 18 vite burg. Por për juristët kjo është një masë drastike, pasi më parë duhen parë rrethanat e aksidentit dhe shkaqet që e kanë sjellë atë. Avokati Saimir Vishaj u shpreh gjatë një interviste për Report TV se është non sens dënimi me 18 vite burg për një aksident, ndërsa për vrasje dënimin është 10 vite.
“Masat e dënimit që propozon Ministria e Brendshme përmes këtij draftit janë drastike. Nëse ne do të konsiderojmë 18 vite për shkelje të rregullave të qarkullimit rrugor, atëherë për vrasje që është 10 vjet, është nonsens. Atëherë do të mbërrijmë te armëmbajtja pa leje që ishte 7-15 burgim, ndërkohë që vrasja ishte 10 vite burgim. Nuk mundet me këtë lloj pasoje. Nëse ne pranojmë që makina, motori që realizon shkeljen e rregullave të qarkullimit rrugor nëpërmjet pasojës së vdekjes, plagosjes së rëndë ose plagosjes së disa personave, është jashtë çdo lloj logjike që mjeti qoftë makina, qoftë motori të konsiderohet mjet krimi. Nuk mund ta konsiderojmë vrasje në momentin kur pasojat vijnë si rrjedhojë e shkeljes së rregullave të qarkullimit rrugor apo nga pakujdesia”, u shpreh Vishaj.
Sipas tij, Kodi Penal ndryshon vetëm në raste të posaçme dhe jo të lidhura me një fenomen apo ngjarje të caktuar.
“Por jam pjesërisht pro kur dehja alkoolike është e qëllimshme, nuk mund ta konsiderojmë shkelje të rregullave të qarkullimit rregullor, kemi të bëjmë me shkelje të vijave të bardha, kemi të bëjmë me vrasje, kur kemi të bëjmë me shkeljen e semaforit të kuq, kemi të bëjmë me vrasje. Duke u nisur edhe nga ngjarja e rëndë në Francë, kur një person me automjetin e tij vrau 70-80 persona. Ka një diskutim kur shkelja e rregullave të qarkullimit rrugor është e qëllimshme dhe ka një diskutim tjetër kur rregullat e qarkullimit shkelen nga pakujdesia dhe pasojat vijnë nga pakujdesia, është dispozita e nenit 290 paragrafi i parë i Kodit Penal”, thotë Vishaj.
Ministri i Brendshëm Saimir Tahiri paralajmëroi ashpërsim të Kodit Penal për aksidentet me pasojë vdekjen. Sipas tij, aksidentet fatale do të konsiderohen vrasje./report tv/a.k
