Babai i Eugen Bitrajt, autorit të dyshuar të vrasjes së 22-vjeçarit Marvi Mihali, i bën thirrje familjes së viktimës për të gjetur forcë dhe tejkaluar këtë situatë të vështirë.
Gjatë një prononcimi për mediat jashtë dyerve të Gjykatës së Tiranës, ai ka kërkuar falje për krimin e të birit, ndërsa ka apeluar për pajtim mes dy familjeve, raporton Report Tv.
“Fjalët e para vështirë t’i gjesh, i urojmë ngushëllime familjes Mihali. Jam prind dhe i shpreh keqardhjes familjen, nënës, babait dhe të afërmve. I them familjes Mihali, të gjejmë forca dhe të reagojmë pozitivisht. Ne nuk kemi mundësi të takohemi, se situata është e nxehtë. Duhet të gjejmë një njeri të përbashkët që të marrim masa dhe të na orientojë drejt zgjidhjes. U krijua nga një karikues celulari dhe ndodhi e gjithë kjo”, tha ai.
Gjykata e Tiranës pritet të japë sot masën e arrestit për katër të arrestuarit për vrasjen e 22-vjeçarit Marvi Mihali dy ditë më parë në zonën pranë stadiumit “Selman Stërmasi”.
Të rinjtë Dejvi Bitraj, Kridens Alla, Marsel Alla, Eugen Bitraj si dhe Marvi Mihali u konfliktuan për karikuesin e një celulari. Viktima i kishte blerë Dejvi Bitrajt, kushëririt të autorit telefonin celular, por më pas ka konstatuar se nuk punonin disa aplikacione dhe ushqyesi.
Ky ka qenë edhe motivi i konfliktit i cili ka përfunduar në përdorimin e thikës ku për pasojë mori plagë në zemër 22-vjeçari Marvi Mihali, i cili humbi jetën rrugës për në spital.
