Ekzekutimi i 32-vjeçarit Can Kariçi është dokumentuar nga kamerat e sigurisë së bizneseve në vendin e ngjarjes. Pas këqyrjes së tyre nga ana e grupit hetimor u evidentua se autorët kanë qenë të maskuar.
Janë të paktën 7 kamera sigurie që kanë xhiruar momentet e vrasjes së të riut, i cili doli nga lokali dhe hyri brenda automjetit të tij me targa gjermane. Në pamjet filmike të cilat janë në duar e grupit hetimor, shfaqen dy persona, njëri nën cilësinë e shoferit ndërsa tjetri të atentatorit.
Autorët dyshohet se janë informuar nga persona të tjerë për lëvizjet e objektivit të tyre. Agresorët, udhëtuan me makinën Audi, të cilën e dogjën rreth 2 kilometër nga vendi i vrasjes. Brenda makinës policia gjeti dhe armën tip kallashnikov me të cilën është kryer qitja në drejtim të 32-vjeçarit. Sipas burimeve të policisë, viktima Kariçi është qëlluar me breshëri plumbash dhe 4 prej tyre të cilat i mori në pjesën e sipërme të trupit, rezultuan fatale.
Edhe në makinën e viktimës u gjet një pistoletë tip Bereta me fishek në gojë, e cila është dërguar në laboratorin e policisë shkencore për të zbuluar nëse është përdorur në ndonjë ngjarje kriminale.
Grupi hetimor ka ndërtuar dhe dinamikën e ngjarjes, ku sipas tyre makina e atentatorëve ka lëvizur nga rruga “Nikoll Vatnikaj”, dhe pas kryerjes së atentatit është larguar drejt zonës së Institutit. Për zbardhjen e kësaj ngjarjeje, policia ka marrë në pyetje disa persona mes tyre rrethin e ngushtë të viktimës, nën shoqërinë e të cilëve 32-vjeçari ka qenë para se të ekzekutohej. Konkretisht janë 3 persona mes tyre dhe një vajzë.
Të tre janë pyetur nga hetuesit, kanë deklaruar se kanë parë duke ikur me shpejtësi mjetin Audi të autorëve. Sipas tyre, Kariçi ka qenë i qetë gjatë kohës në kafene dhe nuk ka shfaqur asnjë shqetësim.
Si pistë kryesore nga grupi hetimor është ajo e larjes së hesapeve mes grupeve kriminale. Kariçi është një emër i njohur për autoritet dhe i arrestuar për herë të fundit në shkurt të këtij viti për armëmbajtje dhe vjedhje.
/a.r
