Policia e Korçës njofton se ka arritur të identifikojë autorin e dyshuar të vrasjes së 20-vjeçarit Johan Zuko, krim i ndodhur pasditen e sotme në lagjen nr. 14.
Pas identifikimit, janë ngritur postblloqe dhe ushtruar kontrolle në disa zona, me qëllim lokalizimin dhe kapjen e tij. Viktima ishte ushtarak dhe po hetohet në disa pista, kryesisht ato që lidhen me konfliktet.
Në kuadër të hetimit, Policia po mbledh dhe sekuestron kamerat e sigurisë të bizneseve dhe banesave në zonën ku ndodhi krimi, me qëllim rindërtimin e lëvizjeve të viktimës dhe autorit para dhe pas vrasjes.
Pamjet pritet të jenë prova të rëndësishme për dokumentimin e dinamikës së ngjarjes.
Sipas informacioneve paraprake, autori dyshohet se e ka ndjekur viktimën, i cili nuk ishte banor i lagjes, dhe e ka kapur brenda një pallati ku i riu kishte tentuar të fshihej dhe e qëlloi me armë.
Pas vrasjes autori është larguar nga vendngjarja dhe vijon të jetë në kërkim.
“Forcat e Policisë po vijojnë kontrollet intensive, ndërsa grupi hetimor po punon për mbledhjen e provave dhe zbardhjen e plotë të rrethanave”, thanë burime zyrtare.
Hetuesit po punojnë gjithashtu për përcaktimin e motivit të vrasjes dhe nëse autori dhe viktima kishin pasur më herët konflikte apo përplasje.
