Ngushtohet tashmë rrethi i gjetjes së autorit apo autorëve të dyshuar për vrasjen e turistëve çekë në Dukagjin. Nga hetimet më të fundit të policisë bëhet e ditur se autori i ekzekutimit të turistëve çek dyshohet të jetë në mesin e 40 të shoqëruarve nga policia për vrasjen në fshatin Prekal të Dukagjinit mbremjen e se premtes.
Teksa priten të mbërrijnë edhe përgjigjet nga laboratori I kriminalistikës në Tiranë të provave të dërguara, armës së krimit, gëzhojave dhe më kryesorës njollave të gjakut të autorit e cila është gjetur në kroskodin e automjetit, burime për JavaNews.al bëjnë të ditur se autori i dyshuar është një 20 vjeçar emri i të cilit nuk bëhet i ditur ende.
Po të njëjtat burime saktësojnë se ai është nga fshati Pult, teksa është evidentuar edhe si kultivues i bimëve narkotike.
Dyshimet janë se personi mund të ketë qenë dhe pjesë e grupit të zjarrit që qëlluan helikopterin e policisë një vit më parë në Pult të Dukagjinit, gjatë operacionit antikanabis. Madje, ka dyshime se autorët ose autori është pjesë e personave që ruajnë parcela kanabisi në zonat e thella të Dukagjinit.
Dyshimet gjithashtu janë se nisur nga fakti që nuk janë marrë sende personale, mbase autorët mund të kenë tentuar të marrin fuoristradën, por kanë dështuar.
Sakaq, me të mbërritur edhe përgjigjet nga laboratori i Tiranës mund të kemi edhe arrestimet e para të kësaj ngjarjeje të rëndë.
