Kanë kaluar mbi 20 vjet nga ajo kohë. Por drejtësia vonon e nuk harron në vende si Zvicra.
Më 3 nëntor të vitit 1999 në Schlieren, Kantoni i Cyrihut, një 20-vjeçar nga Maqedonia e Veriut ishte qëlluar për vdekje. Shoqëruesi i tij 22-vjeçar i kishte mbijetuar sulmit, i plagosur,. Gjatë hetimeve që pasuan, një 18-vjeçar shqiptar ishte dyshuar se ka kryer krimin, por çështja ishte mbyllur në vitin 2003 për shkak të provave të pamjaftueshme.
Rreth 20 vjet më vonë autoritetet po bëjnë një përpjekje për inicimin e sërishëm të procedurës, shkruan Limmattaler Zeitung.
Policia Kantonale e Cyrihut po rifillon tani hetimet me një qasje të re, duke ofruar një shpërblim prej 10,000 frangash, ka njoftuar ajo të enjten. Një arsye për këtë hap mund të jetë fakti se, me përjashtim të vrasjes, të gjitha krimet e tjera të kryera në ambientin e të dyshuarit dhe viktimës janë tashmë të parashkruara (nuk ndiqen për shkak të vjetrimit).
Hetuesit supozojnë se personat e përfshirë në këtë krim dhe të intervistuar fshehin qëllimisht informacionet për autorët dhe motivin e tyre, për të mos u inkriminuar vetë, përcjell albinfo.ch. Kjo tani mund të ndryshojë, nisur nga shkaku i vjetërimit të lëndës sa u përket krimeve të tjera, shpreson Policia Kantonale e Cyrihut.
/a.r
