Një atentat tronditi sërish kryeqytetin mëngjesin e kësaj të premte. Persona ende të paidentifikuar qëlluan me breshëri plumbash brenda automjetit, 48-vjeçarin Lulzim Visha.
Nëpër media po thuhet se kjo ngjarja ka ardhur si pasojë e një hasmërie të vjetër mes familjes Visha dhe personave të tjerë. Kjo për shkak të një vrasje që vëllai i Lulzimit, Besnik Visha ka kryer në vitin 1997. Aso kohe ky shtetas vrau me armë zjarri Refik Domin.
Lidhur me këtë ngjarje së fundmi ka dhënë opinionin e tij gazetari dhe analisti Mentor Kikia. Përmes një reagimi në llogarinë e tij në “Facebook”, Kikia i alarmuar ka ngritur shqetësimin se sa shumë krime po tronditin vendin për shkak të hasmërive të vjetra.
Duke listuar një për një të gjitha arsyet që shtyjnë shqiptarët për të ndërmarrë këtë akt tragjik, të cilët na lejoni të themi që janë për të vënë “duart mbi kokë”, gazetari thekson se ky është një realitet i dhimbshëm për të cilin shoqëria jonë duhet të reagojë.
Reagimi i plotë:
Njerëz të poshtër, drejtësi edhe më e poshtër!
Një burrë, që punonte si postier, u vra sot në mëngjes në Kamëz. Brenda në makinën e tij të punës. Çfarë kusuresh mund të ketë një njeri që punon postier, për të merituar një ndëshkim të tillë? Mediat referojnë burime të policisë, që thonë se motivi i krimit mund të jetë hakmarrja/gjakmarrja. Sepse vëlli i tij kishte vrarë një njeri në viti 1997.
Sa shumë krime janë kryer në emër të hakmarje/gjakmarrjes?
Sa djem e burra janë vrarë për të paguar krimin e vëllait, babait, djalit, nipit, xhaxhait, kushuririt të tretë….
Çfarë race jemi?
Shtatë breza vritemi për një pemë të egër që ka mbirë në mes të gardhit, e grindemi se kujt i përket.
Lëmë hakmarrjen amanet tek nipër e stërnipër, edhe kur sherri ka buruar nga një ofendim apo një shpullë.
Ndjekim deri në Zelandën e Re viktimën e gjakmarrje/hakmarrjes, por këtu votojmë për deputet ish oficerin e Sigurimit të Shtetit që na ka sajuar një dosje me shpifje, duke na internuar familjen e duke na marrë shtëpinë.
Vritemi edhe kur nxitojmë së kush të parkojë i pari makinën në vendin bosh.
Vritemi “për nder” edhe “pse ma pe gruan me sy”, por nga ana tjetër votojmë për kryetar bashkie e deputet dikë që ka dërguar e skllavëruar si prosituta në semaforët e Europës gjysmën e vajzave të qytetit.
Si nuk u hakërryem, nuk u revoltuam, nervozuam, si nuk e ngritëm zërin dhe grushtin ndaj atyre që na kanë vjedhur e na vjedhin, na kanë mashtruar e na mashtrojnë, na kanë detyruar e na detyrojnë të largojmë fëmijët e të ikim nga sytë këmbët edhe vetë nga toka jonë, nga shtëpia jonë….
Drejtësia në shërbim të krimit:
Vëllai i postierit që u vra sot në Kamëz, për krimin që kishte kryer në 1997, ishte akuzuar për “Vrasje me dashje”, dhe ishte dënuar me vetëm 12 vjet burg.
Këto ditë, një gjykatëse në Gjykatën e Elbasanit, dënoi me vetëm 11 vjet burg një vrasës gjakftohtë. Ai vrau një kamarier në lokal sepse i tha se nuk mund të ulej në një tavolinë që ishte e rezervuar. Ai ishte i fortë dhe i forti ulet ku do ai. Autori i krimit është në arrati, nuk është kapur. Ai kishte patur edhe më parë probleme me ligjin. Gjyqi iu bë në mungesë. Prokuroria kërkoi vetëm 20 vjet burg. Gjykata jep 17. Vrasësi është në arrati, ai iu shmang gjyqit, por gjykatësja pranoi kërkesën e avokatit për gjykim të shkurtuar, duke u ulur edhe 1/3 e dënimit.
