Deputeti i PD Kreshnik Çollaku, në një lidhje me Skype në News 24 foli për procesin e primareve që po zhvillohet brenda Partisë Demokratike. Çollaku tha se primaret në PD po bëhen tepër vonë. Ai shtoi se të gjitha partitë opozitare duhet të bashkohen, për të pasur sukses në zgjedhje.
“Primaret janë një proces delikat, sepse vijnë 40 ditë përpara afatit të regjistrimit të kandidatëve dhe 100 ditë përpara zgjedhjeve. Është kohë e papërshtashme për këtë proces. Është një votë brenda partisë. Është një lloj “sherri” brenda llojit, demokratike është patjetër. Në bazë, PD vazhdon të jetë ende e ndarë. Në qarkun e Dibrës, PD ka katër degë dhe janë të përçarë. Primaret po bëhen tepër vonë, duhet të bëheshin përpara 1 viti. PD duhet të bashkohet për sukses elektoral. Duke u bashkuar me njëri-tjetrin, mund të bashkohemi edhe me shqiptarët. Në lista duhet të jenë vetëm ata persona që mbështetën Sali Berishën në stadium. Primaret nuk garantojnë bashkëjetesën. Tek primaret, do fitojnë besoj mbështetësit e Berishës, pasi ai ka mbështetjen më të madhe të demokratëve. Të gjitha partitë opozitare duhet të bashkohen. Primarja besoj do lëndojë bashkimin e demokratëve”, tha Çollaku.
Duke folur për votën e diasporës, Çollaku u shpreh se të gjithë shqiptarët që jetojnë jashtë vendit duhet të votojnë në zgjedhje.
“Të gjithë shqiptarët në diasporë duhet të votojnë në zgjedhje. Primaret pengojnë PD-në të punojë më fort për votën e diasporës. Por, vota e diasporës është në shumicë për opozitën. Kjo, sepse shqiptarët që jetojnë jashtë vendit janë të pakënaqur me qeverinë e kryeministrit Edi Rama. Sa më e ndarë, aq më e dobët është opozita. Jetike janë proceset e bashkimit. Edhe Sali Berisha e ka thënë që PD duhet të bashkohet”, u shpreh Çollaku.
Më tej, Çollaku nënvizoi se ka një shpresë që administrata e re amerikane të heqë non gratën e Sali Berishës. Ai shtoi se PD po rregullon raportet me ndërkombëtarët.
“Ka një shpresë që të hiqet non grata e Sali Berishës nën administratën e Donald Trump. Administrata e re amerikane mund të rishikojë non gratën e Berishës. Ka një përpjekje për të normalizuar raportet mes SHBA-ve dhe PD-së, duke tejkaluar fazën e bllokadës, që ne përjetuam disa kohë më parë”, përmbylli Çollaku.
