Ambasadori i Iranit në Organizatën e Kombeve të Bashkuara, Majid Takht Ravanchi, ka thënë se vrasja e gjeneralit Qasem Soleimanit nga Shtetet e Bashkuara të Amerikës është një “akt lufte”.
Në një intervistë për CNN, Ravanchi ka thënë se “Irani nuk mund t’i mbyllë sytë nga ajo që ka ndodhur. Padyshim se do të ketë hakmarrje – hakmarrje të ashpër”.
“Mbrëmë SHBA-të filluan një luftë të ashpër ushtarake duke vrarë një prej gjeneralëve tanë më të mirë. Pra, si duhet të veprojë tani Irani? Ne nuk mund të heshtim. Ne duhet të veprojmë edhe atë ashpër”, ka thënë Ravanchi.
I pyetur nëse Irani do të veprojë ushtarakisht, ai tha “ndaj një sulmi ushtarak ne duhet të veprojmë ushtarakisht. Kush? Kur? Ku? Mbetet të dëshmohet në të ardhmen”.
Pas vrasjes së gjeneralit iranian Qassem Soleimani, mijëra njerëz kanë vërshuar rrugët e Teheranit për të protestuar kundër Shteteve të Bashkuara.
Shumica e protestuesve mbanin fotografinë e tij, ndërsa disa prej tyre kanë djegur flamurin amerikan.
Në Iran janë shpallur tri ditë zie pas vrasjes së gjeneralit Soleimani, ku ushtria amerikane e lokalizoi në aeroportin ndërkombëtar të Bagdadit dhe kreu një sulm ajror me dron duke lënë të vdekur edhe disa zyrtarë tjerë ushtarakë të Iranit.
Soleimani ishte komandant i njësisë elitare Quds, ndërsa njihej në opinionin si njeriu i dytë më i fuqishëm në Iran.
g.kosovari
