Policia e Tiranës bëri sot publike dy emrat e autorëve që morën pjesë në vrasjen e Elton Çicos, ngjarje e ndodhur në fillim të këtij muaji në kryeqytet. Jani Alia, 39 vjeç dhe Renato Milloshi, 36 vjeç, thuhet se janë autorët që kanë realizuar vrasjen.
Alia ishte në konflikt me Çiçon pasi ky i fundit e kishte qëlluar më armë në Gjirokastër disa javë para ngjarjes në Tiranë.
Por si nisi historia e hakmarrjes mes Elton Çiçës dhe Jani Aliajt?
Pista kryesore e vrasjes së Çiçës sipas burimeve nga grupi hetimor, është hakmarrje për shkak të konflikteve të kahershme mes tyre.
“Panorama.al” mëson se konfliktet që kanë disa vite që janë hapur, zanafillën e kanë në Greqi, për çështjet e pazareve të drogës.
Për shkak të këtyre mosmarrëveshjeve, herë pas here ka pasur tentativa për të eliminuar njëri-tjetrin, por që kanë rezultuar të dështuara, shkruan Panorama.
TENTATIVA E PARE
Ja si ndodhi sipas njoftimit të policisë, atentati i parë ndaj Jani Aliajt në Tiranë:
“Më datë 10.01.2015, në rrugën e “Kavajës”, kanë qëlluar disa herë më armë zjarri. Nga të shtënat është thyer një xham i vetratës së një lokali bar kafe dhe është dëmtuar lehtë shtetasi A.Q, vjeç 27, banues në fshatin Lalar Fier, i cili ka qenë rastësisht në lokal. Në vendngjarje me cilësinë e provës materiale, u gjetën e u sekuestruan 6 gëzhoja fisheku dhe 3 predha plumbi. Punohet për sqarimin e plotë të rrethanave të ngjarjes, identifikimin e kapjen e autorëve. Nenet 274, 278, 150 dhe 90 të Kodit Penal”.
TENTATIVA E DYTE
Kjo është tentativa e dytë që iu bë në Gjirokastër, sipas njoftimit të policisë:
“Më datë 25.04.2016, u referua materialet në Prokurorinë e Rrethit Gjyqësor Gjirokastër, pasi më datë 24.04.2016, rreth orës 22:30, në rrugën Ura e lumit – lagjia “Punëtore”, nga një mjet i paidentifikuar, është qëlluar me armë zjarri në drejtim të mjetit tip “Volksvagen Polo”, me drejtues shtetasin S.M e pasagjer J.A, vjeç 43 e 39, banues në Tepelenë, për pasojë është plagosur lehtë J.A. Punohet për gjetjen e mjetit, identifikimin dhe kapjen e autorëve. Nenet 76, 22 e 278 të Kodit Penal. Komisariati i Policisë Tepelenë”
Jani Alia rezulton të jetë person me precedentë penal, i shpallur në kërkim nga drejtësia greke për arratisje nga burgu, ku vuante dënimin për vrasje.
Edhe Renato Milloshi është një emër i njohur për policinë pasi në vitin 2015 ai është dënuar nga Gjykata e Tiranës për armëmbajtje pa lejë dhe kanosjen e një personi. Panorama
