Prokuroria e Krimeve të Rënda ka dhënë pretencën për ngjarjen e Lazaratit ku mbeti i vrarë efektivi i forcave speciale Ibrahim Basha.
Organi i akuzës ka kërkuar dënimin maksimak, atë me burg përjetë për shtetasit Arbion Aliko, Bajram e Elvis Bocia.
Këta ishin organizatorët kryesorë të sulmit me armë ndaj patrullës policore, e cila po shkonte drejt fshatit pasi ishte raportuar për të shtëna.
Ndërsa për Alban Alikon ka kërkuar 35 vite burg. Për shkak të moshës, këtij të fundit dënimi i kërkuar ulet në 17 vjet e 6 muaj burg. E njëjta kërkesë për dënim vlen dhe për Elton Kazmën.
Ndërkaq, 18 vjet burg janë kërkuar për Dervish Gabën, Ruhan Hirën dhe Iljaz Xhaferrajn.
Për Xhulio Malon është kërkuar 20 vjet burg, i cili për shkak të moshës ulet në 10 vjet. Për Klodian Selimin kërkohet 10 vjet burg ndërsa për Oltion Prokon 18 vjet, të cilit për shkak të moshës i ulet në tetë vjet.
/a.m.
