Gjykata e Tiranës administroi dje dëshminë e Lek Kurtit, babait të Aleksandër Kurtit, shqiptarit të vrarë në mars 1999 në Belgjikë, vrasje ku dyshohet të jetë përfshirë ish-deputeti Mark Frroku.
Në seancën e radhës, gjykata lejoi leximin e deklarimeve të dhëna në Prokurori në nëntor të vitit 2015, për shkak se dëshmitari rezultonte të ishte jashtë vendit. Dëshmia e të moshuarit, i cili nuk përfshinte të pandehurin Frroku në vrasjen e të birit, u kundërshtua nga i pandehuri dhe mbrojtësi i tij raporton Panorama.
Ata i kërkuan gjykatës papërdorshmërinë e saj, me pretendimin se të gjitha faktet e rrëfyera nga i moshuari para prokurorëve ishin bazuar në thashetheme dhe dijeni të marra nga persona të tjerë.
DESHMIA
Lek Kurti kishte deklaruar para prokurorëve se djalin ia kishin vrarë katër shqiptarë në një stacion treni në Belgjikë, por se nuk e dinte shkakun e ngjarjes, apo emra të autorëve. Sipas tij, disa ditë pas vrasjes, në banesën e vëllait të tij kishin shkuar katër burra nga Puka.
“Në takimin e zhvilluar mes tyre ka qenë prezent edhe vëllai tjetër im. Katër personat nga Puka kanë kërkuar dhe dhënë sqarime për vrasjen e djalit tim në Belgjikë. Dy vëllezërit e mi i kanë thënë që ‘ne nuk ju kemi kërkuar shpjegime, pasi ua kemi lënë autoriteteve’”.
Në lidhje me ceremoninë e besë së bërë në varrezat e Rrmajit, i moshuari kishte pohuar se kishte dijeni për të, por se në ceremoni nuk kishte qenë asnjë pjesëtar i familjes Kurti.
“Më thanë që Mark Frroku do të bënte be që nuk ishte i përfshirë në vrasjen e Aleksandrit”, citoi prokurorja Anisa Qilimi deklarimet e të moshuarit raporton Panorama.
Sipas deklaruesit, Mark Frroku kishte qenë një nga katër pukianët që takuan vëllain e tij. Në përfundim, i moshuari shprehej se nuk kishte dijeni nëse Frroku kishte lidhje me ngjarjen e ndodhur në Belgjikë.
“BERA BE”
Nga kafazi i sallës së gjyqit, Frroku mohoi dje të ketë qenë pjesë e 4 personave nga Puka të përmendur nga Lek Kurti.
Nga ana tjetër, Frroku tha se si kishte bërë be në varrezat e Rrmajit, për të treguar sipas rregullave zakonore se nuk kishte lidhje me vrasjen.
“Në vitin 2013 dola për fushatë në zonë. Kam dëgjuar fjalë, që lidhnin emrin tim me këtë ngjarje, ndaj krijova kontakt me familjarë të të ndjerit, të organizonim ceremoninë e besë, sipas zakonit. Kam bërë be unë dhe dy persona të tjerë. Në ceremoninë e besë, mes dhjetëra burrave, kanë qenë të pranishëm dy nipër të familjes Kurti. Është mbajtur një procesverbal për atë ceremoni. Mund t’i gjeni emrat e tyre”, tha Frroku.
