Rreth orës 22:10, në lagjen “Partizani” në Vlorë pranë rrugës drejt Spitalit Rajonal është vrarë me armë zjarri para banesës së tij shtetasi Fatjon Sinani, rreth 40 vjeç, i cili për pasojë ka gjetur vdekjen e menjëhershme.
Si rezultat i reagimit të menjëhershëm të policisë, në ndjekje të autorëve është bërë e mundur kapja dhe shoqërimi i njërit prej autorëve të dyshuar në dalje të lagjes “Partizani”. Ai është shtetasi Neritan Qejvani, rreth 42 vjeç, me të cilin po punohet për zbardhjen e ngjarjes. Policia dyshon se personi në fjalë ka bashkëpunaur edhe me një person tjetër.
Për kapjen e autorit të dytë të dyshuar, janë ngritur pika kontrolli në akset kryesore të qytetit me qëllim kapjen e tij.
Policia thotë se ky person ka mundur të largohet me shpejtësi duke përfituar nga errësira, raporton “B.W”.
Sakaq, në vendngjarje Policia ka sekuestruar armën e krimit, një pistoletë të llojit “Beretë”.
Ndonëse po zhvillohen hetime intensive për të zbardhur shkakun e kësaj vrasje, një nga pistat e mundshme ku po heton policia është edhe ajo e vrasjes për hasmëri. Për të zbardhur më shumë detaje nga ky krim i rëndë, blutë e qytetit bregdetar kanë marrë në pyetje të afërmit e viktimës si dhe banorët e zonës./a.m.
