Gjykata e Krimeve të Rënda ka vendosur masën e sigurisë arrest me burg për 53-vjeçarin Fadil Kasemi, i cili vrau ish-bashkëshorten e tij gjykatëse Fildes Hafizi 39 vjeç. Ngjarja ndodhi më 31 gusht në zonën e Xhamllikut në Tiranë, sapo ish-gruaja doli nga një parukeri.
Prokuroria e Krimeve të Rënda ka ngritur tre akuza ndaj Fadil Kasemi. Ai akuzohet për vrasje për shkak të marrëdhënieve familjare, armëmbajtje pa leje dhe rrëmbim personi.
Para trupit gjykues, 53-vjeçari pranoi krimin por nuk pranoi të jepte asnjë detaj rreth ngjarjes së rëndë.
“Nuk jam në gjendje të mirë shëndetësore dhe prandaj nuk do të shpjegoj çfarë ndodhi atë ditë,” mësohet të jetë shprehur Kasemi përpara gjykatësve.
Fadil Kasemi, e ka pranuar krimin e kryer, para gjykatës së Krimeve të Rënda në Tiranë, ku ka dalë për t’u vlerësuar me masën e sigurisë.
Ai ka qëndruar tepër i ftohtë gjatë gjithë seancës, pa dhënë shpjegime mbi motivet e vrasjes.
Trupi gjykues ka vendosur masën e sigurisë “arrest me burg”, pas kërkesës së prokurorit të çështjes, i cili ngre tri akuza ndaj Kasemit, atë të vrasjes për shkak te marrëdhënieve familjare, armëmbajtje pa leje dhe rrëmbim personi.
Autori i vrasjes së gjyqtares nuk shfaqi shenja pendese për krimin para trupit gjykues
Kasemi mbërriti në Gjykatë nën masa mjaft të larta sigurie.
Në dosjen hetimore të prokurorisë thuhet se Fildeze Hafizi, sapo kishte dalë nga një parukeri dhe i ishte drejtuar makinës që kishte parkuar përballë. Ish-bashkëshorti 53-vjecar i është afruar me pistoletë në dorë dhe ka qëlluar në drejtim të saj dy herë duke e lënë të vdekur në vend. Pas krimit, Kasemi po me armë në dorë ndaloi një furgon të rastit që po udhëtonte drejt rrugës Bardhyl.
Këtij të fundit i ka thënë se kishte vrarë bashkëshorten e tij. Duke e kërcënuar, i kërkoi shoferit ta largonte nga vendi i ngjarjes. Shoferi i furgonit përshkoi rrugën “Arkitekt Kasemi” dhe më pas rrugën “Vllazën Huta” që të dërgon tek komisariati nr.1, duke futur menjëherë në oborr veturën. Aty janë afruar menjëhërë punonjësit e policisë, të cilët ndaluan në flagrancë autorin e vrasjes duke i hequr pistoletën që mbante në duar.
a.ç
