76 deputetë të mazhorancës kanë votuar sot dekretet për largimet dhe emërimet e reja në kabinetin Rama.
Ndërkohë, emri i ministrit të Jashtëm mbetet ende peng i presidentit Ilir Meta.
Pas ngërçit me Gent Cakajn, kryeministri Rama mori përsipër ta drejtojë ai vetë diplomacinë.
Por Presidenti nuk është shprehur ende me dekret për këtë propozim, duke lënë në detyrë Ditmir Bushatin.
Emrat e rinj në kabinet, Taulant Balla i ka cilësuar si mandat historik për të çuar përpara reformat.
Ndryshimet në qeveri:
Ikën Senida Mesi – Erjon Braçe zgjidhet zv. Kryeministër
Ikën Ditmir Bushati – (Pritet dekreti i presidentit)
Ikën Arben Ahmetaj – Vjen Anila Adenaj
Ikën Damian Gjiknuri – Vjen Belinda Balluku
Ikën Lindita Nikolla – Vjen Besa Shahini
Ikën Mirela Kumbaro – Vjen Elva Margariti
Ikën Niko Peleshi – Vjen Bledi Çuçi
Ikën Sonila Qato – Vjen Eduard Shalësi
Hapet Ministria për Marrëdhëniet me Parlamentin – Emërohet Elisa Spiropali
***
Ndërsa Kreu i Kuvendit ka konfirmuar pjesëmarrjen e 76 deputetëve të mazhorancës në sallë, opozita në shenjë revolte ka pushtuar foltoren.
Më pas deputetët e opozitës kanë dalë nga salla ndërsa i vetmi që ka folur ishte deputeti Sali Berisha.
Berisha ka qëndruar në foltore, por pa mikrofon.
Nga ana tjetër, kreu i PD ka folur jashtë sallës duke u shprehur se opozita kërkon debat parlamentar.
“Ne duam të shpalosim qëndrimin tonë për kukullat e oligarkëve që do të bëhen ministra me firmën e Ramës. Opozitën po e pengon të marrë fjalën një hajdut psiqik” – tha Lulzim Basha.
Ai u shpreh se Shqipëria kishte një qeveri në koma, ndërsa sot ka një qeveri të vdekur.
“Jemi në një gjendje emergjence kombëtarë. Për herë të parë nga koha e Enver Hoxhës, kryeministri mban edhe postin e Ministrit të Jashtëm. Faturën e sjelljes pa dinjitet si Pali Miska dhe Lenka Çuko, e paguajnë sot qytetarët” – tha Basha jashtë sallës së Kuvendit.
***
Kuvendi i Shqipërisë ka nisur sot sesionin e jashtëzakonshëm, e kërkuar nga Kryeministri Edi Rama.
Bëhet fjalë për dekretet e shkarkimit dhe emërimit të disa ministrave, ndërsa kryeparlamentari Gramoz Ruçi lexoi rendin e ditës.
I pari fjalën e kërkoi Edmond Spaho, i cili ka kërkuar debat për ndryshimet në qeveri.
Kreu i Grupit të PD tha se opozita nuk ka pretendime për mënyrën e votimit, por për emrat e ministrave të rinj.
Ndërkohë që LSI kërkoi të bëhet publike lista e diskutantëve që kanë paraqitur kërkesën për të folur pasditen e së mërkurës.
Nga ana e tij, Taulant Balla mori fjalën i pari në foltore, veprim ky që u kundërshtua nga Spaho.
Në votimin e sotëm pritet të formalizohet emërimi i ministrave të rinj dhe zv.Kryeministrit, me përjashtim të ministrit të Jashtëm, për të cilin presidenti Ilir Meta nuk është shprehur ende.
/a.r
