Bashkimi Europian do të gjejë mënyra për të disbursuar kredinë e premtuar prej 90 miliardë eurosh për Ukrainën, pavarësisht rezistencës së vazhdueshme të Hungarisë.
“Një vendim u mor në dhjetor dhe kishte një kusht: që tre vende nuk do të merrnin pjesë” në huanë prej 90 miliardë euro për Ukrainën.
“Ai kusht u respektua. Duhet të jemi të qartë: huaja mbetet e bllokuar sepse një lider nuk respekton fjalën e dhënë. Por ne do ta përmbushim” angazhimin, “në një mënyrë ose tjetër”.
Kështu tha presidentja e Komisionit Europian, Ursula von der Leyen, në konferencën për shtyp në përfundim të samitit të liderëve të BE-së, duke iu referuar vetos së Viktor Orban ndaj huasë së përbashkët për Kievin.
Presidenti i Këshillit Evropian, Antonio Costa ka deklaruar se liderët e BE-së e kishin dënuar rezistencën “e papranueshme” të Hungarisë gjatë takimit të tyre.
“Një marrëveshje është marrëveshje, duhet ta mbajmë fjalën. Dhe askush nuk mund ta shantazhojë Këshillin Evropian,” tha Costa.
Kancelari gjerman Friedrich Merz tha se Komisionit Evropian i ishte kërkuar nga liderët të gjente mënyra për të disbursuar kredinë, dhe e quajti veton e Orban një akt të paprecedent “mosbesnikërie serioze”. “Kjo do të lërë gjurmë,” tha ai. “Kjo është një shkelje serioze e parimit të besnikërisë midis shteteve anëtare dhe dëmton pozitën e Bashkimit Evropian.”
