Deputetja e PD-së, Albana Vokshi, i ka konsideruar pushimet nga puna të punonjësve të shëndetësisë si të motivuara politikisht dhe ju bënë thirrje KLSH, prokurorisë, Avokatit të Popullit, institucioneve ndërkombëtare të hetojnë largimet dhe punësimet e paligjshme në spitalet rajonale të vendit.
Deputetja e PD-së Vokshi në një deklaratë për mediat u shpreh sot se “Spastrimet me motiv politik në të gjitha spitalet rajonale dhe bashkiake të vendit koordinohen nga Ilir Beqaj, i mirënjohur si kampioni i korrupsionit në qeverinë Rama.
“Njerëzit hidhen në rrugë në spitalin rajonal të Gjirokastrës, në Kukës, janë pushuar 32 zonja. Në Shkodër u hodhën në rrugë 89 sanitare dhe personeli mbështetës. Ne Fier, vala e dytë e shkarkimeve po prek 20 punonjës, në Kukës 32, në Tropojë 30, në Vlorë 20. Në Elbasan u pushuan 80 nga personeli mjekësor me 15 deri në 30 vite pune dhe një pjesë e madhe e tyre u zëvendësuan me anëtare partie. Urdhrat politike të pushimeve nga puna kanë prekur edhe personat në nevojë dhe atyre me aftësi te kufizuar”, tha Vokshi.
Vokshi theksoi se “PD dënon arbitraritet e qeverisë ndaj këtyre punonjësve, si dhe i bën thirrje KLSH, prokurorisë, Avokatit të Popullit, institucioneve ndërkombëtare të hetojnë largimet dhe punësimet e paligjshme në spitalet rajonale. (javanews.al / a.r)
