Gentian Hoxha, nga qyteti i Vlorës, i dënuar me 10 vjet burg për vjedhjen e 500 mijë eurove në bankën ku punonte ka ardhur në një rrëfim ndjese publike. Këtë ndjesë publike e ka bërë para maturantëve të shkollave të Durrësit dhe ministrit të Drejtësisë.
I shkolluar, elokuent, gjakftohtë, Gentiani u kërkoi të rinjve të mos bien pre e shkëlqimit të parasë, e cila të shkatërron jetën, karrierën, shoqërinë, miqësinë e gjithçka.
“Kam bërë pjesën më të madhe të dënimit, 6 vjet. Kam përballuar presionin shpirtëror dhe moral ashtu edhe shoqëror për shkak të asaj që kam bërë dhe asaj që humba. Kisha rrugë karriere të shkëlqyer përpara. Për shkak të dobësisë time, ai veprim më privoi jetën duke nisur nga karriera, familja, shoqëria, miqësia por edhe stafi dhe kompania ku punoja. Drejtoresha më kishte dhënë shumë besim, dhe e zhgënjeva. Kështu shkatërrova karrierën time dhe besimin e njerëzve të bankës ku punoja”, thotë ai.
Hoxha ndalet edhe tek jeta në burg. “Jeta në burg është e vështirë. Në burgun e Durrësit që kur u transferova edhe të punoj, jam shef i bibliotekës. Vuajtja nisi të lehtësohej nga aktiviteti i përditshëm. Për herë të parë me leje kam dalë pas 3.5 vjetësh. Nuk e merrni dot me mend çfarë ndjesie ishte. Kisha harruar gjithçka, isha bërë një njeri i huaj, për jetën që ishte jashtë, pavarësisht se familja dhe shoqëria më qëndroi afër”, thotë ai.
BW/d.i.
