Në kuadër të fushatës për zgjedhjet parlamentare të 25 Qershorit, drejtuesi politik i Qarkut të Vlorës Damian Gjiknuri prezantoi kandidatet Vilma Bello, Elona Hodaj dhe Saniela Xhaferri në rajonin nr.5. Gjiknuri kërkoi një votë masive për Partinë Socialiste që të mundësohet qeverisja më vete duke marrë 71 mandatet e nevojshme.
“Me vë në borxh me votë, më jep pushtetin e plotë që të bëj kontratën me qytetarët dhe nesër më kërko llogari. Jo pastaj që kam disa aleatë, aleatët shohin vetëm interesat e tyre ekonomike dhe të gjithë përgjegjësinë politike ta mbajë Partia Socialiste. Kjo nuk shkon! Prandaj ka ardhur momenti që ti bëjmë thirrje të gjithë qytetarëve që votën ta çojnë tek Partia Socialiste. Ta çojnë tek PS, të marrim 71 mandate dhe ta qeverisim të vetëm këtë vend, që të bëjmë realitet edhe gjitha projektet që thamë për Vlorën por të zbatojmë edhe programin tonë ambicioz”, tha Gjiknuri.
Kryetari i Partisë Socialiste të Vlorës Anduel Tahiraj vlerësoi kandidatët që paraqiten për votim para qytetarëve. “Kur shikojmë nga të gjitha partitë e tjera se çfarë kandidatësh prezantojnë, ne jemi më të priveligjuarit si Parti Socialiste sepse në gjirin tonë kemi Vilmën, kemi Elonën, kem Sanielën, kemi njerëzit më të shkëlqyer që kanë lidhje me Vlorën. Ata kanë lidhje me hallet e njerëzve dhe jam i sigurtë se në 25 Qershor ne do ti themi përfundimisht stop atyre partive të vogla ose atyre partiçkave të vogla të cilat në kurrizin tonë për 25 vjet sillen sikur nuk kanë qenë asnjë ditë në pushtet”, u shpreh ai.
Kandidatja Vilma Bello vuri theksin tek projektet e investimit që janë ndërmarrë në qytetin e Vlorës. “Është realizuar rruga Transballkanike që të gjithë e prekim dhe askush nuk e kishte menduar se do ta kishim të tillë. Jemi sot dëshmitarë të realizimit dhe të fillimit të punimeve të ndërtimit të Rrugës Demokracia, pjesë e të cilës jeni të gjithë ju dhe në të cilën ndajmë përditshmërinë. Patjetër që gjithçka e nisur do të vazhdojë dhe ajo që ne u kërkojmë sot dhe që jemi të gjithë bashkë, që të gjithë e duam dhe kërkojmë është që ti japim besimin Partisë Socialiste, për të votuar vetëm numrin 2”, nënvizoi Bello.
Ndërkaq, kandidatja Elona Hodaj tha se vendimi i qytetarëve më 25 Qershor duhet të mos ketë mëdyshje për të zgjedhur numrin 2 dhe Partinë Socialiste.
“Jemi të bindur që kemi akoma më shumë për të bërë. Fillimi ka qenë i mbarë, prandaj të gjithë sëbashku të ecim drejt të ardhmes, të mos kthejmë kokën dhe as kohën pas. Të ecim në rrugën që meriton Shqipëria dhe për më shumë qyteti i Vlorës. Le ti kthejmë Kryeministrit tonë atë respekt që tregoi për qytetarët e Vlorës dhe për Vlorën tonë”, theksoi Hodaj.
ma.me
