Presidentja e IOC, Kirsty Coventry, e para grua në këtë detyrë, deklaroi se të gjitha sportistet që marrin pjesë në garat olimpike të Los Angeles 2028, do t’i nënshtrohen testimeve gjenetike për të konfirmuar se janë biologjikisht femra.
“Ato ç’ka kemi shpallur janë politika të bazuara në shkencë dhe të udhëhequra nga ekspertë mjekësorë. Në Lojërat Olimpike edhe diferencat më të vogla mund të përcaktojnë fituesin, ndaj nuk do të ishte e drejtë që meshkujt biologjikë të garojnë në kategorinë e femrave. Në disa sporte, kjo mund të jetë edhe e pasigurt”, u shpreh ajo.
Ky vendim vjen pas disa vitesh debat mbi pjesëmarrjen e sportisteve transgjinore dhe u përshëndet menjëherë nga Shtëpia e Bardhë, e cila theksoi se Trump kishte nënshkruar një urdhër ekzekutiv në shkurt 2025 që synon ndalimin e sportistëve transgjinorë në sportet për vajza dhe gra, përmes ndërprerjes së fondeve federale për institucionet që i lejojnë ata të garojnë.
Vendimi synon të garantojë drejtësi dhe siguri në konkurrencë, ndërsa IOC thekson se rregullat e reja bazohen në argumente shkencore dhe mjekësore mbi avantazhet fizike në sport.
Ky ndryshim i rëndësishëm vjen pas një periudhe të gjatë diskutimesh dhe polemikash në sportin ndërkombëtar, ku çështja e përfshirjes së atletëve transgjinorë ka ndarë opinionin publik dhe komunitetin sportiv.
Ndërkohë, vendimi ka ngjallur reagime të ndryshme. Mbështetësit e konsiderojnë atë si një hap për të mbrojtur barazinë në sportet e femrave, ndërsa kritikët paralajmërojnë se mund të çojë në diskriminim dhe përjashtim të sportisteve transgjinore.
