Kombëtarja shqiptare pati disa peripeci dje në aeroportin e Vjenës, por disa orë më parë pati edhe më keq për pasagjerët që udhëtonin drejt Londrës.
Një alarm për bombë solli bllokimin e fluturimit drekt kryeqytetit anglez, por fatmirësisht gjithçka rezultoi e paqenë.
Një grua mendoi se personi pranë saj kishte lidhje me ISIS. Pasagjerja ka pikasur në telefonin e personit që ka pasur në krah një mesazh që e ka konsideruar se kishte të bënte me organizatën terroriste.
Ajo ka dhënë alarmin dhe të gjithë pasagjerët kanë zbritur nga avioni dhe autoritetet kanë bërë kontroll të imtësishëm të tyre dhe të bagazheve. Kjo procedurë ka bërë që avioni të vonohej për rreth tri orë. Në momentin që është marrë siguria e plotë se asnjë prej pasagjerëve nuk ka rrezik, atëherë është kryer edhe udhëtimi i rregullt i avionit drejt Londrës.
Si gruaja që ngriti alarmin edhe personi i dyshuar nuk kanë udhëtuar me atë avion që duhet të niseshin për në Londër. Autoritetet në aeroport kanë hetuar mbi ngjarjen dhe ka rezultuar që personi i dyshuar ka qenë një student irakian që kryen studimet në Londër. Kjo ngjarje ka shkaktuar jo pak probleme për oraret e fluturimeve të ndryshme.
BW
