Shkrimtari dhe publicisti shqiptar nga Maqedonia Kim Mehmeti, në një intervistë dhënë për portalin dritare.net të Tiranës, pohon se Maqedonia i ngjan shtetit të përkohshëm, por me pasoja afatgjata për shqiptarinë.
Sa i përket organizmit politik të shqiptarëve të Maqedonisë dhe veçanërisht bashkëveprimit mes partive opozitare shqiptare, Kim Mehmeti pohon se Këshilli Opozitar ku bën pjesë ai, nuk është përjashtues ndaj asnjë individi apo subjekti politik, por nuk është as gjithëpërfshirës për karrieristët, injorantët dhe hajdutët partiak. E më së paku, thotë Mehmeti, KO mund të shndërrohet në lavatriçe ku do i shpërlajnë mëkatet e veta ata që politikën e kanë kuptuar si biznes fitimprurës, ku harxhohesh ngadalë dhe nuk ke asnjë përgjegjësi, por pasurohesh shpejtë dhe të gjithë të nënshtrohen ty.
Mehmeti rithekson se nuk e sheh vetveten si politikan aktiv, por thjeshtë si njeri publik, i cili dëshiron ta japë ndihmën e vet modeste në etablimin e një gjenerate të re të pakompromituar politike shqiptare, e cila nuk do ndjehet inferiore ndaj palës maqedonase dhe e cila nuk do ketë shenjë njohëse injorancën dhe krimin, siç janë drejtuesit e sotëm të BDI-së.
