Janë bërë të shpeshta tashmë rastet kur shtetas të ndryshëm mashtrojnë qytetarët në këmbim të shumave të ndryshme duke iu premtuar vende pune. Një vajzë e re nga Elbasani u arrestua pasi u merrte deri në 2 mijë euro bashkëqytetarëve duke u premtuar vend pune në shtet, por ajo i mbante me mashtrime derisa humbiste kontaktet.
Të shumta janë edhe rastet kur qytetarët mashtrohen gjoja për dokumente apo punësim të rregullt jashtë vendit.
Me sa duket, kjo skemë e shpeshtë po shfrytëzohet edhe nga persona që vijnë nga jashtë vendit. Një shtetas nga Maqedonia ka arritur të mashtrojë dhjetëra persona në Tiranë. Bëhet fjalë per personin me inicialet I.A. i cili u ka marrë qytetarëve shuma të konsiderueshme prej disa mijëra euro, në këmbim të ‘punëve të mira’ jashtë vendit raporton Java News.
Por, pasi arriti të mashtrojë dhjetëra qytetarë, ai u ndalua nga policia. 40-vjeçari u shoqërua në komisariat ku u ballafaqua me denoncimet. Tashmë ai do të përballet me akuzën e “mashtrimit”./JavaNews/a.m.
