Policia e Shtetit dhe OSHEE vazhdojnë punën e përbashkët për evidentimin dhe vënien para drejtësisë të autorëve të vjedhjes së energjisë elektrike, si dhe për ndërprerjen e lidhjeve të paligjshme të energjisë elektrike.
Gjatë periudhës 19- 25 tetor, në të gjithë vendin kanë vepruar çdo ditë 115 grupe të përbashkëta Polici – OSHEE. Janë kryer kontrolle të përbashkëta Polici – OSHEE në 3.348 raste. Si rezultat i kontrolleve të kryera në terren në abonentët biznes dhe familjarë, janë evidentuar 40 raste të vjedhjes së energjisë elektrike me 40 autorë.
Nga këta, janë arrestuar në flagrancë 16 persona të cilët akuzohen për vjedhje të energjisë elektrike dhe janë shpallur në kërkim 14 persona. Gjithashtu po ndiqen në gjendje të lirë 10 persona. Po gjatë kësaj periudhe janë ndërprerë 1. 231 lidhje të abonentëve debitorë dhe 40 lidhje të paligjshme.
Gjatë kësaj jave janë proceduar penalisht 3 punonjës të OSHEE-së. Gjithashtu janë kontrolluar 74 kabina elektrike dhe abonentët që furnizohen nga këto kabina. Policia e Shtetit dhe OSHEE janë të vendosur ta çojnë deri në fund punën e nisur, deri në shkëputjen e fundit të lidhjeve të paligjshme, duke përballur me forcën e ligjit të gjithë ata persona, të cilët abuzojnë me energjinë elektrike, duke e vjedhur atë, qofshin këta përfaqësues biznesesh, individë, apo punonjës të vetë OSHEE-së.
ATSH
