Skandali i vjedhjes së Bankës së Shqipërisë pritet të ketë edhe vendimin përfundimtar për autorët e dyshuar, rreth 1 vit pas kësaj ngjarje. Në seancën e sotme gjyqësore, avokati mbrojtës i Ardian Bitrajt, bëri apel që të ndryshojë akuza ndaj klientit të tij pasi nuk ka asnjë fakt që të provojë vjedhjen në bashkëpunim me Mimoza Bruzian e Klevis Bejtian.
Avokati e ka argumentuar këtë me faktin se Bitraj është thjesht një person i fiksuar pas bixhozit.
Ndërsa vetë Bitraj u shpreh përpara trupit gjykues se vjedhja e BSH ishte një periudhë e errët e cila s’do të përsëritet më, duke i kërkuar gjykatës t’i jap mundësinë të rikthehet në shoqëri për të nisur jetën si një qytetar normal.
Pamundësia e avokatit mbrojtës të Mimoza Bruzia për të renditur konkluzionet u bë shkas që seanca të shtyhet për më 20 maj.
Ardian Bitraj e Mimoza Bruzia dy ish zyrtarët e Bankës së Shqipërisë akuzohen se vodhën thesarin e bankës në bashkëpunim. Skandali i vjedhjes u pasua dhe me shkarkimin e guvernatorit Ardian Fullani, ndaj të cilit ka një hetim të hapur për shpërdorim detyre dhe abuzim me tenderat dhe paranë publike.
