Pamjet filmike të një kamera të instaluar në dhomën e kasafortës së bankës janë prova kryesore e policisë dhe prokurorisë së Tiranës për zbardhjen e vjedhjes së 21 milionë lekëve në degën e BKT-së në zonën e Bllokut, në Tiranë. Filmimet e rregjistruara nga kjo kamera tashmë janë sekuestruar me urdhër të prokurorisë, ndërsa në këto pamje, njëri nga autorët e vjedhjes duket qartësisht në pjesën e fytyrës, pasi është kthyer në pjesën ballore të saj.
Pikërisht ky moment ka shërbyer për ngritjen e dyshimeve për dy persona, të cilët mësohet se tashmë janë identifikuar, por priten verifikimet e mëtejshme për të proceduar më tej me marrjen e tyre në pyetje apo dhe vënien në pranga nëse provat janë të mjaftueshme për përfshirjen e tyre në grabitjen spektakolare të bankës.
Aktualisht hetimet janë përqëndruar pikërisht në këtë moment me shpresën e identifikimit të shpejtë të autorit, që është fiksuar nga filmimet e kameras, i cili mund të çojë edhe në zbulimin e autorëve të tjerë të grabitjes.
“Në këtë drejtim po punohet shumë me ekspertë të laboratorit të policisë shkencore dhe oficerë të policisë kriminale, me qëllim identifikimin e këtij personi”, thanë për Shqiptarja.com burime pranë grupit hetimor.
Ndërkohë dyshime të forta janë ngritur prej hetuesve se në këtë ngjarje mund të ketë gisht ndonjë prej punonjës ose ish-punonjësve të bankës, që mund tu ketë dhënë informacion grabitësve lidhur me koordinatat e sakta të vendodhjes së kasafortës të bankës në zonën e ish-Bllokut.
Rënia e alarmit, nuk u morën masa
Një person i maskuar shfaqet duke hapur një tunel tjetër që të çon tek kasaforta e bankës, thonë burimet dhe veprimi i fundit i tyre është kryer në datën 6 gusht ku nga ora 23:13 deri në orën 23:19 minuta është kryer edhe boshtisja e kasafortës me 21 milionë lekë, të cilat ishin në valutë kryesisht dollarë dhe euro. Prokuroria thotë se duke qenë se dhoma e kasafortës ka sistem sensorësh të instaluar, përveç kamerave, nga goditjet për hapjen e tunelit në dy raste, zyrtarët e bankës janë njoftuar në telefon se diçka po ndodhte.
Alarmi i parë ka mbërritur rreth orës 20:00 të mbrëmjes të së premtes në telefonin e drejtorit të bankës, tek shefi i sigurisë dhe te shoqëria që ruante objektin. Kamerat tregojnë që ata shkuan në bankë dhe pasi këqyrin vendin dhe nuk konstatojnë asgjë largohen.
Alarmi i sensorëve ribie në telefonat e tyre edhe mbrëmjen e të shtunës dhe sërish ata rikthehen në vendngjarje pa zbuluar asgjë. Burimet thanë se mosveprimet e Luigj Gjonajt, drejtor i Bankës dhe shefit të sigurisë, Florian Skarra i dyshon ata për shpërdorim detyre e për këtë arsye ata janë arrestuar.
shqiptarja.com/d.i.
